Jamawi minongigit produk Baja Plan Growth Promoting Rhizobium (PGPR) EM Booster, Real Strong.
KOTA BELUD: Konsep ‘Kebun Dapur’ i pointutunan do Komontirian Pomutanaman, Ponginsadaan om Pomorunan Akanon (MAFFI) Sabah pikikiro potimpuunon do kolimpuunon toun tiso’ sabaagi ponginsomokan oponsol montok popoinggayo kogompitan mogigiyon labus kakadayan id kaparagatan pomutanaman kitukuran okoro’.
Montiri Pomutanaman, Ponginsadaan om Pomorunan Akanon, Datuk Jamawi Jaafar minobroos, inggisaman dilo’ kituduan mongukab liwang om kosiwatan agayo kumaa mogigiyon kampung montok momutanom id koiyonon walai sondiri’ miampai kos di osiriba’, potilombus dino kapanahak koundaran miampai mitilombus kumaa koposion tadau-adau rayat.
Ka disio, konsep Kebun Dapur pinalan sabaagi laang ‘praktikal’ montok popohompit bobos ginumu’ mogigiyon kosuul no tinimungan momutanom, momukabun okoro’, monginsada’ om mongindapu’ desa i kogumuan diolo’ poinhompit id siktor pomutanaman.
Ka disio, pibarasan miampai Monunurat Pointatap Komotirian masaan powonsoiyon montok monginsonong kopoindalanan konsep dilo’ mooi do aanu popoindalan miampai oulud om kiwaya’.
“Insya’-Allah, miampai pamalanan di oulud, konsep Kebun Dapur diti aanu popoindalan do kolimpuunon toun tiso’,” ka disio onto minoboros pinopoimagon Ramai Pomupusan Ababayan PMD om Mini Karnival Usahawan Desa id Lintuhun Poingukab Datuk Haji Musbah Haji Jamli, di tadau baino’.
Jamawi (kotolu, gibang) om Leonard (koduo, gibang) minintong produk wagas nokoiyonon di sinusulap pokikitanan do hilo’.
Ka di Jamawi, pointonod tadau kumoiso’ disio ruminuput sabaagi montiri, angkab agayo disio nopo nga’ montok monguhup mogigiyon labus kakadayano m monimbuat bantug nogi’ kasasanangan mogigiyon kampung i tumalahan kumaa siktor pomutanaman sabaagi intodonon nindopuan.
Pinopolombus nogi’ isio kounsikahan tu’ nokosiwatan tuminindapou id ramai dilo’ om nokoruba’ mitoguang miampai tongo’ mongindapu’ desa i komoyon disio kiharo sunduan nogi’ angkab di kawas montok lumantoi id kaganaan kopongindopuan.
Minanangkabayahan nogi’ isio kumaa duo kotinanan pomutanaman pogun – Kotinanan Pomorunan Gata’ Sabah (LIGS) om Kotinanan Komogoton Tana’ Pogun Sabah (LKTNS) – mantad inggisaman diolo’ huminompit miampai aparagat id koburuon mongindapu’ labus kakadayan.
Ka di Jamawi, tongo’ tutumanud ababayan okon nopo ko’ nakamaramit ponguhupan kakamot kigatang gisom RM6,000, nga nogi’ onuan sokodung po’ompus kaampai pangahakan pidagangan asil miampai lobi oulud om kiwaya’, kaampai maya’ ponginsomokan digital.
Jamawi (wanan) miampai sawo, Datin Zainatunnisa Ibrahim minogonsok kuih panjaram om poingintong ilo suai.
Minoboros isio, nantadon disio sabaagi songulun momumutanom om momumukabun kapasaga’ disio mamarati miampai poinralom koinggoritan, kaantaban nogi’ kogunoon mogiigiyon kampung, i potuu sabaagi mororobuat, papadaadagang, monginsada’, momukadai toi ko’ momumutayam.
Nawawaya’an dilo’ ka disio, gunoon poinponu’ disio id inggisaman popoburu’ mogigiyon labus kakadayan, kosuul no i kopohompit siktor pomutanaman, montok mongingkawas kasasanangan om rontob koposion rayat.
Daamot dilo’, Jamawi lumantad kouhupan po’ompus id pialatan kotinanan poinhompit nogi’ bohogian abaal aanu monginggirot montok poposiau koburuon om kasasanangan mogigiyon labus kakadayan.
Minonongkounsikou nogi’ isio kumaa oinsanan bohogian i nokohompit kaampai komontirian, kotinanan popoindalan om Puruankuasa’ Popoindalan mantad kinalantaion pinapaanjur Ababayan PMD om Mini Karnival Usahawan Desa.
Nokotindapou nogi’ i Puru Lintuhun Undangan (ADUN) Tempasuk, Datuk Mohd. Arsad Bistari; Monunurat Pointatap Komontirian, Datuk Leonard Stephen Poyong; Luguan Monguhup Monunurat Bohogian Koburuon Ikonomi Komontirian Komogoton Desa om Watas (KKDW), Farah Ahmad; bagas ADUN Tempasuk, Datuk Haji Musbah Haji Jamli; Monijor Agayo LIGS, Sabdil Tanjong; mongobi’ Monijor Agayo LKTNS, Haji Fauzie Haji Jamlee om Potunud Kotorinaan, E-lokal Sdn. Bhd. om Mongungulud Ababayan Pidagangan Digital (PMD) Desamall, Ahmad Shah Wahid.
