KOTA KINABALU: Parti Gagasan Rakyat Sabah (Gagasan Rakyat) pinoposotol do nombo-nombo puru dau i minaganu kootusan montok tumanding sabaagi calon Bebas id Pomilian Agayo Pogun Lintuhun Undangan Pogun (DUN) Sabah 2025 maan pataamo’ do misondikot.
Monunurat Agayo Gagasan Rakyat, Datuk Mohammad Razali Razi minoboros laang dilo’ pasansala’ poinponu’ di ningkakaton parti sabaagi komponen id Gabungan Rakyat Sabah (GRS).
“Laang tumanding id tikit Bebas nopo nga’ pasansala’ di ningkakaton om kootusan parti. Nombo-nombo tulun i momili’ do popowonsoi dilo’ aiso’ nodii nunu-nunu pisowitan miampai parti toi lansanon, sundung diolo’ nopo nga’ puru Gagasan Rakyat pogulu diti,” ka disio id kointalangan di tadau baino’.
Minoboros isio parti minomonsoi katatapan atalang do laang disiplin kaampai kapataaman misondikot maan onuo’ kumaa nombo-nombo puru i manahub kootusan dilo’.
“Bohogian parti amu’ monimbang id haal disiplin om kinotiu’on. Pokionuon tokou oinsanan puru, mononokodung om kukumaraja’ parti moningkanan poinponu’ kumaa papatantu’ kalantaion calon ngaawi’ GRS montok timpu dumontol rayat Sabah,” ka disio.
Gagasan Rakyat minokianu nogi’ koinsanai pakakaraja’ om mononokodung do monginggirot piisaan dumontol PRU DUN Sabah 2025 mooi do kinalantaion piomungan dilo’ kotilombus oigitan.
