Hajiji miampai di Joniston Kiulu), Jasnih (Pantai Dalit) om Dr. Bonaventure (Tamparuli) miampai tongo’ mononokodung GRS i tuminimung id Padang Kakadayan Tuaran ontok tadau kopomungaranan calon PRU DUN Sabah Ko-17.
TUARAN: Boyoon Montiri (KM) i po nogi’ Ponorikohon Gabungan Rakyat Sabah (GRS), Datuk Seri Haji Hajiji Haji Noor monongkotumbayaan do piomungan GRS om Pakatan Harapan (PH) kaanu mandat ogirot montok monuridong koporintaan katalib Pomilian Agayo Pogun (PRU) Lintuhun Undangan Pogun (DUN) Sabah Ko-17.
“Kootuson dilo’ atalang – otumbayaan oku GRS om PH koponuridong koporintaan,” ka disio soira’ rinubaan katalib pinapafail foom kopokipilian disio id Lintuhun Seri Sulaman do hiti, di tadau baino’.
Hajiji po nogi’ Presiden Parti Gagasan Rakyat Sabah (Gagasan Rakyat) om mongingigit timpohon DUN Sulaman, nokorikot id longkod pomungaranan calun di jaam ko 9 kosuabon, tinanud di kopomuruanan GRS nogi’ rinibuan mononokodung.
Hajiji miampai di Joniston (Kiulu), Jasnih (Pantai Dalit) om Dr. Bonaventure (Tamparuli) miampai tongo’ lansanon om mononokodung GRS huminuyud mantad natad upis Parti Gagasan Rakyat Sabah (Gagasan Rakyat) Sulaman pinakaya’an doid longkod pomungaranan calon Lintuhun Seri Sulaman, Tuaran di tadau baino’.
Poingampai nogi’ disio mongingigit ADUN Pantai Dalit, Datuk Jasnih Daya; Mongingigit ADUN Kiulu, Datuk Joniston Bangkuai; nogi’ calun wagu montok DUN Tamparuli, Dr. Bonaventure Boniface. Koinsanai diolo’ pinopotoguang foom kopokipilian sompoopori.
Montok timpohon Sulaman, Hajiji potoguang pisahapan limo sunduk. Jasnih nopo monoguang pialaan turu’ sunduk id Pantai Dalit, Joniston monokisahap id pisahapan walu’ sunduk doid Kiulu, naamot di Dr. Bonaventure tumanding id pialaan 13 sunduk doid Tamparuli – wookon timpohon bobos agayo pisahapan id pomilian agayo diti baino’.
Hajiji pinapatahak foom kopokipilian id Longkod Pomungaranan Calon, Lintuhun Seri Sulaman, Tuaran, di tadau baino’.
Minongomi koyuon id Sulaman, ka di Hajiji, otumbayaan isio GRS kaanu kalantaion agayo id koiyonon dilo.
“Noilaan tokou no calun ngaawi’ i mitanding id watas Sulaman. Iti no demokrasi, isaisai nopo kasaga’ tumanding. Nga’ otumbayaan oku kopio do calon GRS kalantoi miampai majoriti di agayo id koiyonon Sulaman,” ka disio.
Daamot dilo’, pinosotol di Hajiji do laang okodou onuon kohodot nombo-nombo puru Gagasan Rakyat om GRS i momili’ do tumanding sabaagi calon Bebas id pomilian agayo diti baino’.
“Nakaramit oku nogi’ kopoilaan. Montok parti ngaawi’ i tumanding, kaanu tokou mamaramit. Nga’ montok puru ngaawi’ Gagasan Rakyat om GRS i tumanding sabaagi calon Bebas, maganu tokou laang montok papataam diolo’ mantad parti,” ka disio pinoposotol.
