Haji Hajiji Haji Noor
KOTA KINABALU: Komilaan boros kabansaan toririmo nosili tingkananon koporintaan tu’ ilo’ nopo nga’ kapapanau tonggungan oponsol id koponompuruan rayat om monuridong kointutunan kabansaan Malaysia.
Boyoon Montiri, Datuk Seri Haji Hajiji Haji Noor minoboros, koporintaan pogun tumilombus miuhup oronit miampai Dewan Bahasa om Pustaka (DBP) montok monginggirot inggisaman papabantug boros kabansaan id Sabah.
Minoboros isio, iti kaampai no monginggirot ekosistem boros, kesusasteraan om koposolimbahan id pogun diti maya’ mogisusuai koyuon piuhupan kohunung, kaampai id kaganaan koposolimbahan akademik, ponuridongan bakat ponuratan omulok nogi’ ponolidikan boros om ‘dialek’ nokoiyonon id Sabah.
“Kalansanan ku piuhupan diti kotilombus oinggirotan mooi do Sabah kosili wookon pogun i posogulu id koposunian nubasanan toilaan om kobontugan id pomogunaan boros kabansaan,” ka disio ontok pinopoimpuun Wulan Boros Kabansaan id Lintuhun Amil Jaya, DBP Raan Sabah, do hiti di tadau baino’. Teks boboroson disio binasa’ di Speaker Lintuhun Undangan Pogun (DUN), Datuk Seri Kadzim M. Yahya.
“Ontok pinapawalad Bajet 2026, i Luguan Montiri, Datuk Seri Anwar Ibrahim pinoposotol kawagu tonggungan disio montok monginggirot pomogunaan Boros Melayu,” ka disio kawagu.
Hajiji minoboros, pongonjuran Wulan Boros Kabansaan nuru’ tilombuson sabaagi impohon do posuni kopongupusan do boros kabansaan nogi’ monginggirot pisompuruan id nayatan mogigiyon orukut tinaru id Malaysia.
“Mogisusuai inggisaman pinoindalan, kaampai ababyaan diti, okon nopo ko’ poposili Boros Melayu sabaagi ‘medium’ pilumaagan oponsol nga nogi’ sabaagi boros toilaan, koubasanan om pisompuruan.
“Inggisaman diti tantu’ no do kapatantu’ rayat mogisusuai tinaru id pomogunon diti kotilombus komilo boros kabansaan,” ka disio.
Kalansanan di Hajiji mogisusuai kaparagatan i pohoroon kopihondot Wulan Boros Kabansaan koposindak kawagu kopurimanan oupus om oondos do boros pinotomod pomogunon; monginggirot pisompuruan maya’ kaparagatan doun boros om kesusasteraan; nogi’ kopokito tonggungan boros om sastera kabansaan sabaagi gamut ponuridongan tinaru om komogoton.
“Unsikohon ku nogi’ kopongonjuran Karnival ‘Bahasa Jiwa Bangsa’ i maan pohoroo’ kopihondot kimpin ‘Dekad Bahasa Kebangsaan’ nayatan pogun Sabah sabaagi wookon mantad kapamaramaian Wulan Boros Kabansaan diti.
“Inggisaman miagal diti kopokito do Boros Melayu kotilombus oluhub om koinggayo id ginaro rayat Sabah nogi’ kosili kokitanan pisompuruan, komiloon om komogoton maya’ boros i koponompuru tinaru.
“Kogompitan mogisusuai bohogian, mantad susumikul gisom no do mogigiyon ginumuan, kopunong kopio montok papatantu’ sunduan om ‘rusod’ Boros Jiwa Bangsa opurimanan do oinsanan nayatan mogigiyon,” ka disio.
Kalansanan po nogi’ disio miampai mogisusuai inggisaman diti, sukod wagu tumilombus mongupus boros kabansaan suai ko’ minsingilo boros suai.
“Otumbayan oku maya’ piuhupan oronit id pialatan DBP, Komontirian Balajaran Malaysia om koporintaan pogun, inggisaman papabantug boros kabansaan kotilombus oinggirotan kopiongoi di angkab Malaysia Madani,” ka disio.
