Joniston minamaramit foom kosompuruan PBS mantad di Justin.
KIULU: 33 tulun kaampai bagas pakakaraja otuo koporintaan mantad pipiro Longkod watas Mongundi (PDM) id Kiulu pinopotunui upalai montok sumompuru Parti Bersatu Sabah (PBS).
Tinimungan dilo’ binuruan id bagas Upisor Watas Okoro’ Kiulu, Justin Ginduk pinapatahak foom kosompuruan kuminaa di Luguan Kopointalangan PBS po nogi’ Luguan Bohogian PBS Kiulu, Datuk Joniston Bangkuai, id iso’ ababayan toniba’ do hiti, di tadau baino’.
Wookon diolo’ i pinapatahak upalai nopo nga’ i bagas Monguhup Injinior Koupisan Karaja Agayo (JKR) Tawau, Henry Timbangan om pipiro lansanon mogigiyon.
Ka di Justin, kootusan diolo’ sumompuru PBS winonsoi do osombulu’ rolou montok popokito sokodung kumaa kopomuruanan di Joniston nogi’ i poburuon po’ompus parti dilo’ id kopogowitan koburuon om kosimbanon id watas Kiulu nogi’ mongobi’ kopotutan rayat Sabah.
“Suminompuru yahai do PBS tu’ otumbayaan do kopomuruanan di Datuk Joniston. Nokopokito isio dau sabaagi lansanon kitonggungan i toririmo miampai rayat om ogoris kumaraja’ montok kasasanangan diolo’,” ka disio.
Komoyon po nogi’ disio o PBS sabaagi songinan parti di otiu’, haro prinsip om pointopot kumaa koburuon labus kakadayan nogi’ kopogorisan mogigiyon.
Naamot dilo’, i Joniston po nogi’ mongingigit timpohon Lintuhun Undangan Pogun (ADUN) Kiulu, minamaramit osonong kinosuangon puru wagu dilo’ om minongomi diolo’ sabaagi ponokotanda’ sokodung nayatan siriba’ kumaa PBS di nokoinggirot id Kiulu.
“Kootusan lansanon mogigiyon om bagas pakakaraja’ koporintaan kinawaya’an suminompuru PBS kopoinggirot po do tonggungan parti montok tumilombus papatahak surupukaraja’ miampai pointulid ginawo kumaa rayat.
“Iti kopokito pason pisompuruan om surupukaraja’ i nowit do PBS kakal kaanu koiyonon id ginawo rayat,” ka disio.
Pinosotol nogi’ di Joniston do PBS tumilombus monginggirot piromutan miampai mogigiyon montok papatantu’ koburuon labus kakadayan kotilombus oingkawasan om koundaran dilo’ aramit do oinsanan nayatan mogigiyon id Kiulu.
