Haji Hajiji Haji Noor
KOTA KINABALU: Koporintaan pogun pinoposotol tonggungan montok monginggirot pomorunan halal sabaagi wookon siktor kikosiwatan agayo mongunsub kosunion ikonomi, potilombus dino kopongukab kosiwatan kumaa mongindapu’ nokoiyonon lumapus pidagangan sompomogunan.
Boyoon Montiri, Datuk Seri Haji Hajiji Haji Noor minoboros, pomorunan halal noondo nokoburu’ kopio miampai gatang dagangan pomogunan nokosigampot bobilion dolar, om nosili nogi’ mongunguhup agayo kumaa pidagangan sompomogunan.
“Pomorunan halal kalantoi soira’ dati’ do gumura’ oinsanan. Miampai haro sokodung poinpuli mantad koporintaan, kotinanan, siktor swasta om tinimungan mongingindapu’, produk Sabah kikosiwatan agayo lumapus pidagangan labus pogun,” ka disio.
Minoboros isio dilo’ ontok pinopoimagon MyHalal Day Sabah 2025 id Lintuhun Sa’adah, Wisma MUIS, do hiti di tadau baino’. Teks boboroson disio binasa’ di Montiri Sains, Tiknologi om Inovasi, Datuk Dr. Mohd. Arifin Mohd. Arif.
Hajiji minoboros, koporintaan pogun maya’ Upis Kumoduo Monunurat Koporintaan Pogun (Karaja’ Ngaawi’ Pinotomod) om sokodung Kounsol Ugama’ Islam Sabah (MUIS) pinoposodia’ kopoobian pinotomod soginumu’ RM5,000 kumaa mongindapu’ kotej om mikro.
Ponguhupan diti, ka disio, pinatahak id upa’ kakamot monotk mongingkawas kopoindalanan pongindopuan. Nga’, kosudongan kopio nopo nga’ mongindapu’ kiguno lobi pogulu tumanud Kurusus Kopoindalanan Takanon Id Islam i poindalanon do MUIS Halal Hub.
“Kapanahakan sijil halal okon nopo ko’ kopokito sinonong, koburision om tinonggungan produk, nga nogi’ kunci osuul montok lumapus pidagangan halal i nokoburu’ i potuu id Sabah, Malaysia toi ko’ id nayatan sompomogunan.
“Miampai tumanud pomorunan halal, mongindapu’ kaanu mongingkawas ginoris rumompok , potilombus dino koponimbuat ngaran Sabah sabaagi wookon papamanau oponsol pomorunan halal songkoiyonon.
Minoboros isio, pongonjuan solinaid tolu tadau minimpuun tadau Kolimo nakatalib nakapanahak koundaran agayo kumaa tutumanud maya’ mogisusuai pinonuan, kaampai klinik halal, kurusus kopoindalanan akanon, panambarasan digital halal, suai ko’ kinopoilangan perbankan karait skim ponguhupan kapanahakan sijil halal.
“Kaparagatan miagal diti kopongingkawas kopurimanan mongindapu’ montok mongupalai sijil halal, suai ko’ monginggonop diolo’ di toilaan i gunoon montok monginggirot ginoris rumompok produk,” ka disio pinopointalang.
