Jahid miampai tombului suai minintong pokikitanan sayau dilo susumikul Toun 6.
TENGHILAN, TAMPARULI: Tadau Paganakan apatut silihon kopokitanan pilisihan om kopogiagalan id pialatan molohing, tangaanak, mongingia’, sitaf sikul nogi’ mogigiyon nokoiyonon.
Montiri Koburuon Labus Kakadayan, Datuk Seri Jahid Jahim minoboros, ababayan miagal diti koowit rati agayo id koponompuruan institusi sikul miampai molohing om mogigiyon.
“Ababayan Tadau Paganakan okon ko’ kaparagatan ‘riadah’ nopo toi momolihis, nga’ koiyonon i kopoinggirot piromutan oinsanan puru sikul miampai mogigiyon,” ka disio ontok pinopoimagon Tadau Paganakan SJK (C) Chung Hwa Tenghilan, do hiti di tadau baino’.
Nokotindapou nogi’, Ponorikohon Kotinanan Ponguludan Sikul (LPS) SJKC Chung Hwa Tenghilan, Johnson Wong om i Molohingon Koisaan Molohing om Mongingia’ (PIBG) sikul, Sylvia Desmond Lee.
Ka di Jahid, soira’ pilisihan kosili impohon piromutan, nga’ koimbulai no mogigiyon di lobi misompuru ogirot, sopirati om sopipantang tiso’ om tiso’.
I Puru Lintuhun Undangan Pogun (ADUN) Tamparuli dilo’ pinoposotol nogi’ koponsolon piuhupan ogirot pialatan molohing, mongingia’ om mogigiyon montok papatantu’ kalantaion sikul.
Ka disio, balajaran okon ko’ kopohompit nopo naangayan akademik, nga nogi’ koponuridongan ‘sahsiah’ susumikul mooi kosili tulun di aadas.
Id boboroson disio, minamason nogi’ isio kumaa susumikul mooi do opinogot monugat toilaan.
“Minsingilo no otootopot mooi do kalantoi id balajaran do somonu’ om kaanu poposimbuat ngaran sikul. Kalantaion okon nopo ko’ kapanahak koondosan kumaa tinan sondiri om paganakan, nga nogi’ kumaa sikul, mongingia’ om mogigiyon,” ka disio kawagu.
Daamot dilo’, Molohingon Agayo SJKC Chung Hwa Tenghilan, Chong Chee Thart, minoboros ababayan dilo’ kituduan monginggirot sunduan kopogi’isaan suai ko’ manhaak kosiwatan kumaa puru sikul do popironit piromutan lobi kogirot.
Tadau Paganakan SJKC Chung Hwa sinuangan mogisusuai kaparagatan miagal pokikitanan sinasawat, pomurutan tikit kinasip nogi’ ababayan doun paganakan ‘sukaneka’ i kopohompit susumikul, mongingia’, molohingon om mogigiyon nokoiyonon.
Ababayan dilo’ nakaanu raramit kounsub mantad mogigiyon pososorili’ Tenghilan, miampai lobi 10 sinusulap padadagangan takanon om inumon, tinunturu’, mini fun fair, suai ko’ surupukaraja’ spa om refleksologi.
