Hajiji minamaramit ‘resolusi’ konvensyen mantad di Presiden USIA, Datuk Sapawi Ahmad.
KOTA KINABALU: Boyoon Montiri (KM), Datuk Seri Haji Hajiji Haji Noor minoboros, koulalaho’ buli (mongumang-umang) i nakadaadala’ id longkod pinsingilaan om sikul doid Sabah om pomogunon diti nuru’ intangan poinwagat om soibahan osikap.
“Yoho’ do poinpoopori kakaus om tumongob kopio di nunu i naantakan. Iti nopo nga’ iso’ koyuon di amu’ apatut do aantakan.
“I nopo lobi kopotongob nga’ koyuon buli id nayatan susumikul diti naantakan nogi’ id sikul ugama’! Mogigiyon tumimpuun do mombohit, om yoho’ nga’ mokimoilo nunu kopio i naantakan.
“Poingkuro o koulalaho’ buli miagal diti kasaga’ do haro id songinan kotinanan i mogowit kokitanan kinobituahon Islam? Hinombo silap dilo’?” ka disio ontok minoboros pinopoimagon Konvensyen Du’at id Longkod Konvensyen Sompomogunan Sabah (SICC) do hiti di baino’.
Kohondot dilo’, otumbayan i Hajiji do konvensyen haal ugama’ Islam nopo diti nga’ koiyonon bobos osonong mogintong kinolomogon, monginsonong kinokurion okon nopo ko’ id sikul, nga nogi’ id koinsanai kotinanan, i potuu pasanganu koporintaan toi ko’ siktor swasta.
Minoboros isio, sabaagi rayat id sosonginan pomogunon di mogisuai tinaru, tulun Islam amu’ kaanu mongilag mantad kotoguang kobolingkahangan kopohompit ugama’ diolo’, kosuul no id media sosial.
Pinopolombus isio kotongoban di kinotonuan ‘propaganda’ pinudali’ kaampai habar amu’ otopot om totondos, ilo’ nopo nga’ takal-akal araat i gunoon do tinimungan anti-koporintaan miampai tuduan papaatu’ toi momiraag ngaran lalansanon atantu’ dumontol pomilian agayo pogun i minririkot.
“Suai ko’ haal pulitik, haro nogi’ haal suai i pinoinggayo-gayo, miagal kopohompit ikonomi, koumoligan, kolidasan, sandad posorili’ om haal 3R (Tinaru, Ugama’ om Raja), om nogi’ i institusi Molohingon Agayo Pogun nga’ sinangod om siniisinda’,” ka disio.
Amu’ koindai, ka disio, kinaantakan kopotongob kopohompit koulalaho’ buli id nayatan susumikul sikulan gisom nokoowit kinapataion.
“Haal diti nga’ pinoinggayo-gayo di wookon ‘netizen’ i aiso’ tinonggungan, gisom katama’ mongudut, papatayad habar pinudali’ nogi’ minonondos tulun di atantu’,” ka disio.
Boyoon Montiri minoboros, kinomogoton osikap tiknologi kointalangan do timpu-timpu diti nokopongiwang pomogunan aiso’ piwolitan, nokoposili pomogunan nokoingkoro’ kumaa nunu i komoyon sabaagi ‘Global Village’, hinombo oinsanan nga’ id pompod tunturu’.
Kaantaban, ka disio, nokoinggayo miampai kinosupuan ‘aplikasi’ wagu ointutunan sabaagi ‘Kecerdasan Winonsoi’ (AI) i winonsoi montok monguhup popoinsanang karaja’ id timpu doun kaawagu diti.
“Nga’, id sambalik koundaran om kagaganapan tiknologi wagu diti, ilo nga’ nokoowit nogi’ do kopongundoronokan awagat kumaa dati’, kosuul no tulun Islam, nung pasalaon guno toi silihon sindata’ montok momonsoi ‘infografik’, ‘audio’ toi video pinudali’ miampai tuduan mongumpadan kaadangon ummah id pototongkod pomogunan,” ka disio.
“Pomogunaan sala’ aplikasi diti nopo nga’ kaantaban agayo i potoguang tokou do timpu diti. Nuru’ sorohon do pomogunan digital, kaampai tiknologi internet, toririmo osikap koburu’.
“Potitikid tadau, sinupu’ wagu nowonsoi do saintis om mongungulud, gisom do moomoguno toomod sasaru’ amu’ kaanu tumanud kinoburuon dilo’. Kotongoban otopot nopo nga’ kohondot sakag wagu nogi’ sakag dumontol id pomogunon tokou,” ka disio.
Hajiji minoboros, otopot nopo nga’ tiknologi wagu koponolod koposion tulun soira’ tongo’ pogun nongkoburu’ mogigusa’-gusa’ momonsoi gajet om mogisusuai po sinupuan, okon nopo ko’ monguasa’ pidagangan pomogunan, nga nogi’ montok mangampawong om monolod pomusarahan tulun.
Kohondot dilo’, ka disio, hiti no tonggungan molohing, mongingia’, pendakwah, momuruan kotinanan om luguan mogigiyon do gunoon montok mangahak nogi’ mongumolig sakag wagu.
“tonggungan monuduk sukod wagu om monuridong puru mogigiyon nopo nga’ iso’ ‘fardu kifayah’ i somuli’ dilo’ agayo kopio.
“Mantad dilo’, ilo’ mositi’ poindalanon miampai poinponu’ tonggungan nogi’ kopongupusan kumaa tinaru om pogun,” ka disio.
