KOTA KINABALU: Boyoon Montiri, Datuk Seri Haji Hajiji Haji Noor miampai sawo, Datin Seri Hajah Juliah Salag di tadau baino’ ruminuba’ tina’ di Allahyarhamah Zara Qairina Mahathir, Noraidah Lamat id Sri Gaya montok pinoporikot koponongkosiohan om kolisihan di poinsangkad. (Gambar).
Pinirubaan dilo’ notindapou nogi’ di puru ngaawi’ MUTIARA GRS.
“Id koobian koporintaan pogun, popolombus oku komi ‘takziah’ om kolisihan di poinralom kopio kumaa paganakan di Allahyarham Zara Qairina. Sambayang tokou mooi paganakan oonuan ginaras montok monoguang pogumbalan diti,” ka di Hajiji.
Minoboros isio, sabaagi laang osopung om kointalangan do opoduli’ koporintaan pogun kumaa kobolingkahangan diti, minonuhu’ isio di montiri kitonggungan kumaa portfolio balajaran Sabah, Datuk Dr. Mohd. Arifin Mohd. Arif, nogi’ Puru Lintuhun Undangan Pogun Kawang, Dato’ Sri Ghulamhaidar Khan Bahadar do kuminakap di Allahyarhamah Zara Qairina di maso dau mamaramit pongusapan id hospital.
Ka di Hajiji, lakun ‘solidariti #JusticeforZara’ i pinogura’ do ‘netizen’ monugat kaadangan montok di Allahyarhamah Zara Qairina iso’ laang i apatut royohon, nga’ tulun ginumuan nuru’ mongilag mantad mimpomonsoi pagkakaa (spekulasi) di aiso’ nimpohon.
“Patahakon tokou kumaa bohogian pulis om bohogian kikuasa poinghompit montok popoindalan ponoriukan om lumansan dilo’ do aanu manalasai osisikap,” ka disio kawagu.
Naamot dilo’, i Juliah pinopoilo do karati isio kopurimanan songulun tina’ i natagakan tanak koupusan.
“Koumoligan tangaanak, kosuul no susumikul sikul ki’asrama, mositi’ onuan koposuulan montok mongilag kaantakan araat miagal diti do aantakan kawagu,” ka disio.
Allahyarhamah Zara Qairina, susumikul Tingkatan 1 Sikul Mananga’ Kabansaan Ugama’ (SMKA) Tun Datu Mustapha id Papar, nokoidu’ pogun di ko 17tw Koturu’ katatalib soira’ nokito amu’ kopuriman doros asrama dau, iso’ kinaantakan nokoponigowo i nokoponinong kopononsogan mooi do laang koumoligan susumikul impidotan.
