Masidi Manjun
KOTA KINABALU: Montiri Kousinan Sabah, Datuk Seri Masidi Manjun minogolim totondos Presiden Parti Warisan, Datuk Seri Shafie Apdal do bayaran kawagu bon koporintaan pogun kiginumu’ RM1 bilion di toun 2019 nopo nga’ naangayan agayo pomorintaan Warisan, om minongomi dilo’ do “kopomurilong” om “pasansala’di kointalangan di pinosurat”.
“Kointalangan otopot koposusui kaantakan di suai. Soira’ Bon Koporintaan Pogun Sabah RM1 bilion (2014/2019) pinosoliwan di wulan Kohopod om Duo 2014, Bank Negara Malaysia pinapatatap koporintaan pogun monuridong Tabung Amanah Pelunasan (Sinking Fund) kosuul montok papatantu’ bayaran kawagu poinponu’ aanu popowonsoi soira’ do osukod,” ka disio id kointalangan di tadau baino’.
Masidi pinopointalang, id siriba’ karalano’ dilo’, soginumu’ RM200 riong nuru’ poobion do tikid toun solinaid limo toun mooi do bayaran kawagu amu’ kosili tonggungan kousinan di monigowo, amu’ momuntuk parti nombo i momorinta’ di maso dilo’.
Tumanud rikod, ka disio, toluod kumaa Tabung Amanah Pelunasan winonsoi tumanud timpu nakatantu’ di pinatatap: RM2 riong di 2016 (pinawalad di 2015), RM200 riong di 2017 (pinawalad di 2016), RM400 riong di 2018 (pinawalad di 2017), om RM380 riong di 2019 (pinawalad di 2018). Noopod RM18 riongh nopo nga’ naanu mantad bunga’ kinopoopuan tabung dilo’.
“Totondos do kaka om nasansagan Warisan minogihum RM600 riong id timpu pipiro wulan amu’ kopokito katapatan tu’ timpu bayaran nakatantu’ no pointonod di 2014 om kousinan di gunoon nokoobi’ no id palan kousinan mogisuai toun koporintaan pogun,” ka di Masidi pinoposotol.
Minoboros isio, po’ompus pomorintaan Warisan, iso’ no kinopoobian bayaran kawagu bon ilo’ nopo nga’ RM380 riong di toun 2019 i pinawalad, iso’ tonggungan i maan poindalano’ do nombo-nombo koporintaan i mongigit pomorintaan di maso dilo’.
Nolim po nogi’ di Masidi totondos di Shafie do RM500 riong asil bon dilo’ pinabalanja’ id pogun suai, om minongomi dilo’ do “aiso’ nimpohon om aiso’ tinonggungan”.
“Totondos awagat miagal diti, i aiso’ nunu-nunu kointalangan ogirot, kopomurilong rayat om kopongumpadan kotumbayaan kumaa koponguludan kousinan koporintaan pogun,” ka disio.
Tumanud rikod pinotomod, pinointalang disio, asil bon kiginumu’ RM1 bilion dilo’ ginuno poinponu’ montok tuduan pogun Sabah – RM544 riong montok minambayar bon koporintaan pogun kumoinsan i pinosoliwan di 2009, om RM456 riong po montok minambayar projik koburuon pogun id siriba’ Bajet Pogun 2014 di pinolulus.
Pinosotol disio do bayaran kawagu bon tuminanud timpu nakatantu’ nopo nga’ tonggungan undang-undang om kuntirik, okon i ko’ laang pinimporian.
“Disiplin kousinan om ‘struktur’ i kapasaga’ bayaran kawagu diti tinuridong di 2014, okon i ko’ di 2018,” ka di Masidi.
“Pibarasan ginumuan karait kousinan pogun mositi’ mimpau kointalangan di pinosurat, okon i ko’ numbur nopili’ toi ‘naratif’ pulitik i kapanahak koundaran kumaa bohogian atantu’. Rayat Sabah kikopotutan kaanu katapatan di otopot,” ka disio kawagu.
