Rafie (tanga’) pinatahak setifikit kumaa tutumanud kurusus.
KENINGAU: Soginumu’ 25 tulun komulakan mantad pososorili’ watas diti tuminanud Kurusus Impuunon Seni Lukisan Mural pinaanjur Komontirian Komulakan om Spoot Sabah (KBS) i pinapanau solinaid tolu tadau, minimpuun di ko 11 gisom ko 13tw Ko’onom 2025 id Taman Bandukan Riverside Resort.
Ababayan pintoriningan impuunon diti kituduan popointutun di tinimungan komulakan kumaa kaganaan seni mural sabaagi iso’ koyuon komilaan kreatif i kikosiwatan monuridong karaja’ nogi’ koonuan nindopuan.
Po’ompus kurusus dilo’, tutumanud nonuan kopoilaan ‘teori’ om pintoriningan ‘praktikal’ kopohompit impuunon lukisan, karalano’ pomogunaan saat nogi’ kapamansaian mural do mitilombus.
Ramai kinatahakan setifikit nokopupus kurusus pinoindalan di Monontuduk Apantang Kelab Komulakan Keningau, Rafie Robert. Nokotindapou nogi’, Monguhup Upisor Komulakan om Spoot (P) Bohogian Keningau, Ezran Abdullah.
I Rafie id boboroson disio minokianu di tongo’ tutumanud do tumilombus momoguno komilaan di naanu sabaagi impuunon montok umampai id kaganaan seni miampai lobi pointopot om abaal.
“Seni mural okon ko’ ponginlumis nopo do okito, nga’ kaanu sumili karalano’ monuridong kointutunan mogigiyon nogi’ intodonon nindopuan nung poburuon no miampai komersial,” ka disio.
Pinosotol nogi’ disio do ponginsomokan miagal diti kopongukab kosiwatan kumaa komulakan labus kakadayan do popokito kabaahan id kaganaan seni visual potilombus dino monginggirot ikonomi kreatif id nayatan nokoiyonon.
“Kurusus nopo diti nga’ wookon mantad inggisaman Komontirian Komulakan om Spoot Sabah id kapagarasan kosiwatan komulakan maya’ kaganaan seni om komilaan kreatif i kosudong do kopokionuan pidagangan maso-maso,” ka disio.
