PENAMPANG: Pulis Watas Penampang masaan monoriuk iso’ kes kinapakahan padsakaian i naangayan id Ralan Tambunan-Kota Kinabalu kopohompit songulun tulun nolohing, miagal i nokotonu’ id media sosial di kaawagu diti.
Luguan Pulis Watas Penampang, Superintenden Sammy Newton id iso’ kopointalangan di tadau baino’ pinopohimagon do bohogian disio nakaramit ruputan pulis kohondot kinaantakan dilo’ di ko 12tw Koonom katatalib.
“Kinaantakan kopohompit songinan padsakaian apat ruda tumurug i tinanggayan di songulun notondosan kusai. Naantakan ilo’ soira’ di notondosan minanahub padsakaian di nogompitan, songulun tulun nolohing kiumur 64 toun, ontok minaya’ ralan songinan kampung id Penampang,” ka disio.
Ka disio, kes kakal id ponoriukan om inggisaman mogihum di notondosan masaan poindalanon.
Kes sinoriuk id siriba’ Seksyen 379A Kanun Keseksaan, i koposodia’ ukuman jiil gisom turu’ toun om aanu mongontok danda’ nung hompit kasalaan.
Daamot dilo’, tulun ginumuan i kiharo kointalangan kokomoi kinaantakan pokionuon momoromut Upisor Monoriuk, Insp. Mohd Anis bin Abdullah id numbur 013-636 5734 montok monguhup ponoriukan.
I Sammy minamason nogi’ do tulun ginumuan do amu’ popintonu’ nunu-nunu kointalangan pilasu karait kinaantakan dilo’ id nombo-nombo platform media sosial, montok mongilag kakasahan ponoriukan om koponinong korosian ginumuan.
