Haji Hajiji Haji Noor
KOTA KINABALU: Bagas ADUN Petagas, Datuk James Ligunjang, minanangkabayahan kumaa koporintaan Pogun Sabah i binuruan do Gabungan Rakyat sabah (GRS) mantad kinopongokunan sabaagi Pogun Bobos Abantug Malaysia (Negeri Paling Cemerlang Malaysia) montok toun 2024 id Gaa’ IBR ASEAN 2025 di nabantug.
Gaa’ dilo’ i pinaanjur do International Business Review (IBR) montok manahak kopongokunan pomuruanan abantug, naangayan ikonomi om kopoindalanan ogirot id nayatan tongo’ pomogunan ASEAN.
“Bayahan kumaa di Boyoon Montiri Datuk Seri Haji Hajiji Haji Noor om nuludan Kabinet disio mantad kopomuruanan osonong nogi’ tonggungan kumaa kinoburuon Sabah,” ka disio id iso’ kointalangan.
“Walai tokou, yati’ manamong,” ka wagu di James, pinoposotol do koponsolon karaja’ om tonggungan nokoiyonon id kinopoburuan pogun.
Kinopongokunan dilo’ pinahabar do Sekretariat Gaa’ IBR ASEAN, i pinapangaran nogi’ do pogun Negeri Sembilan sabaagi Pongun Bobos Progresif Malaysia montok 2024. Montok kumoinsan nogi’, gaa’ diti pinapatahak nogi’ kopongokunan kumaa koporintaan pogun mantad tonggungan kohunung diolo’ id kopoburuan pomogunon.
Pinomilian kalantoi winonsoi do Panel Abaal i kapaampai tongo’ tokoh nointutunan mogisusuai kaganaan om sinokodung di kointalangan nogi’ kinapagadangan tangabaal.
Id siriba’ pomuruanan di Hajiji, Sabah nakaanu pamantangan bobos akawas mantad kinalantaion kinopoindalanan palan koburuon Sondikoton Sabah Maju Jaya (SMJ) i mimpau do apat tukod agayo: popoburu’ kopotutan Sabah, kopoindalanan kitonggungan om opulokis, koburuon kopiongoi di Wawasan Kemakmuran Bersama 2030, nogi’ monimporon pisompuruan mogigiyon orukut tinaru.
Wookon naangayan agayo Sabah di pinointanga’ nopo:
Kinoingakawason agayo id geran pinotomod Pisompuruan mantad RM26 riong di 2022 kuminaa RM600 riong di 2025;
Kinoonuan katalib RM3 bilion asil Pibatosan Pisokodungan Komersial (CCA) miampai PETRONAS di 2023;
Kinosimbuaton kopoopuan labus mantad RM132 riong di 2023 kuminaa lobi RM1 bilion di 2024;
Kinoingkawason kinorikotan tutumombului labus soginumu’ 47 pihatus, nokoponginggirot siktor ponombuluyan pogun;
Kinoburuon projik Ralanagayo Pan Borneo i koporomut kakadayan oponsol om koiyonon labus kakadayan.
Luguan Panel Hakim Gaa’ IBR ASEAN, Datuk Seri Azman Ujang, minoboros do Sabah nokopokito kosiwatan agayo id kobuuron ikonomi om kopogompian tonduli’ sandad posorili’.
Rinoitan disio o Taman Pomorunan Kota Kinabalu (KKIP) sabaagi poiradan bobos osonong, i nokoposurat rontob kinopongingiyonon bobos akawas soginumu’ 90 pihatus miamapi 288 mangangapu’ apagarat. Sabah nga’ nokoposurat nogi’ rontob kinosunion ikonomi kapamansaian bobos akawas id Malaysia soginumu’ 4.4 pihatus di 2023.
I Azman minamarayou po nogi’ tonggungan Sabah kumaa koburuon ogirot, miampai 62 pihatus mantad tana’ pogun – kaagal do 4.6 riong hektar – pinohimagon sabaagi poingidu’ mantad kopogonuan balak sabaagi wookon karalano’ ponondulian gompi’ timpu anaru.
Ramai kinapatahakan gaa’ pinotomod poindalanon do ko 19tw Koturu’ 2025 id Longkod Konvensyen Sompomogunan Sabah (SICC), Kota Kinabalu. Boyoon Montiri, Hajiji pikikiro kotindapou sabaagi tombului apantang id ramai ki’uhu “REIMAGINING ASEAN” kopihondot Malaysia sabaagi Ponorikohon ASEAN 2025.
Kopongokunan po nogi’ diti iso’ po naangayan oponsol montok Sabah id siriba’ pomorintaan GRS, potilombus dino kopogirot tonggungan pogun diti id kopoburuon pomogunon om songkoiyonon.
