PITAS: Lobi 2,000 susumikul mantad turu’ tinan sikulan id watas Pitas noondo diti nakaramit ponguhupan miampai mitilombus montok kogugunoon sinikulan tadau-adau diolo’ maya’ inggisaman Tonggungan Sosial Korporat (CSR) wagu do SMJ Energy Sdn. Bhd. miampai sokodung Yayasan MyKasih.
Inggisaman diti pinoimpuun di Montiri Kousinan po nogi’ Ponorikohon SMJ Energy, Datuk Seri Masidi Manjun id iso’ ramai doid SMK Kanibungan, do hiti di tadau baino’.
Minoboros isio, ababayan diti kopokito tonggungan SMJ Energy montok papatantu’ koundaran asil pomorunan tumau om gas Sabah patahakon kawagu kumaa rayat, kosuul no tangaanak Sabah i po nogi’ timpu dumontol pogun diti.
“Nung okuri’ ponguhupan diti koposimban koongoiyon koposion sosongulun susumikul, nga’ ilo’ nopo iso’ kopoopuan di agayo kopio gatang,” ka disio kawagu.
Ababayan diti kapaampai tolu tinan sikul mananga’ om apat sikul osiriba’ id Pitas om poposodia’ tusin tunui au’ oigitan montok kopomolian takanon om kakamot ponurat id kantin nogi’ koperasi sikul.
Karalano’ diti papatantu’ kinotulidon om ponguhupan patahakon mitilombus kumaa susumikul.
Masidi nga’ pinoposotol nogi’ do Pitas nopo wookon watas i kotoguang kaantaban sosioikonomi bobos agayo id Sabah om tikid tanak nuru’ onuan kosiwatan di miagal amu’ momuntuk nantadon.
Yayasan MyKasih nopo kapapanau tonggungan oponsol id kinopoindalanan ababayan diti, kaampai miontong om poposodia’ ruputan waya’ tumanud timpu.
“Inggisaman diti kopomogonop inggisaman po’ompus bohogian sikul, upisor balajaran om koburuon nokoiyonon id Pitas. Kopuriman yahai do popoburu’ balajaran labus kakadayan momoguno pogiuhupan mogisusuai bohogian,” ka di Masidi.
