KOTA KINABALU: Tungkusan koubasanan mogigiyon Murut insan po nokopomowongi’ ngaran Sabah om Malaysia id nayatan sompomogunan soira’ Sayau Magunatip pinokitanan miampai poinponu’ sunduan om kabaalon id Festival om Pinialaan Sayau Rayat Sompomogunan ko-26, International Instanbul HarmanFolk Folk-Dance Music Festival/Competition i nakapanau doid Istanbul, Turkiye, minimpuun ko 29tw Kolimo gisom ko 1tw Koonom katatalib.
Lobi kopoondos, pokikitanan koimbayat diti nowit di sontinimungan susumikul kibakat mantad Sikul Mananga’ Ponit Kabansaan (SMJK) Chung Hwa, Tenom, okon nopo ko’ nokoimbayat ginawo mio’ontong sompomogunan, nga pinabantug sabaagi Bontugan Koinsanai id pinialaan dilo’, minangala’ 13 tinimungan suai mantad mogisusuai pomogunan.
Kinalantiaon diti napatanggayan po nogi’ do iso’ po naangayan kopoondos soira’ tinimungan dilo’ gina’an po nogi’ do Gaa’ Pokikitanan Bobos Osonong (Best Performance Award), potilombus dino nokopoinggirot naangayan tinimungan sabaagi wookon i bobos osonong id nayatan global.
Sayau Magunatip, i pisowiton do mogigiyon Murut, momoguno kinopulokison poinsusuul om pogi’irusan di akawas. Susumayau nuru’ sumimpod id pialatan watang poring i pohondoton tumanud loyuk – iso’ pokikitanan di okon nopo ko’ koimbayat id pongintongan, nga nogi’ kopokito ginaras tinan, disiplin om tungkusan koubasanan di poinralom.
Kaa di popotorining koubasanan sikul dilo’, Siti Faridah Lawadin, kinalantaion nopo diti nga’ mantad kinopinogoton tongo’ susumikul om sokodung ouli’ mantad bohogian sikul nogi’ mogigiyon.
“Nakalantoi yolo’ minonoibau 13 tinimungan suai mantad poliliput pomogunan om nosili bontugan. Iti okon nopo ko’ nokoponimbuat ngaran sikul om Sabah, nga nogi’ nokopo’iliu seni koubasanan tokou id sinasawat pomogunan,” ka disio.
Ka disio kawagu, kinotonudan diti nosili impohon oponsol id kopobontugan koubasanan nokoiyonon kumaa nayatan sompomgounan nogi’ koposuni kopurimanan oondos id nayatan sukod wagu do tumilombus tumungkus om momogompi’ seni koubasanan.
Pokikitanan po nogi dilo’ nga’ nakaanu tapap longon di agara’ mantad mio’ontong sompomogunan om tongo’ tinonudan koubasanan i nokotindapou. Ilo’ miampai amu’ mitilombus koponginggirot piromutan diplomatik id pialatan Malaysia om Turkiye maya’ ponginsomokan koubasanan nogi’ tungkusan, potilombus dino kopotigulai Sabah sabaagi wookon pogun i aparagat popointutun koubasanan tinaru dau id nayatan global.
Tinimungan mantad SMJK Chung Hwa Tenom diti nakalantoi minomupus kinatalahanan bontugan nokopogulu mantad Rusia, i nakalantoi do edisi pinialaan di toun 2024.
Tinonudan susumikul miampai popotorining om upisor manananud nokorikot id Tutubpoon Kapal Sompomogunan Kota Kinabalu di jaam ko 1 minsusuab baino’. Binuruan yolo’ di Luguan Kontinjen, Irene Josie Sambag, om sinuau di mobi’ Koupisan Balajaran Sabah, Upisor Balajaran Watas Tenom, Puru Kotinanan Sikul, alumni, Molohingon SMJK Chung Hwa, Oou Chu Suan om sawo, nogi’ mobi’ Koisaan Molohing om Mongingia’ (PIBG).
Kinalantaion diti nosili kointalangan do seni koubasanan tungkusan kaanu sumili jambatan kumaa pisompuruan om koondosan rayat, nogi’ sabaagi tataba’ oponsol id koposimbuatan kokitanan pogun id mato pomogunan. Suai ko’ Magunatip, sayau kipas om kuntau nga’ pinokitanan nogi’ sabaagi sayau tungkusan Malaysia.
