Dr. Joachim (tanga’) guminambar pongingitanan miampai mogigiyon kampung om oinsanan i nokotindapou id pamaramaian Ramai Kaamatan Kg. Sinurai.
RANAU: Lobi 400 mogigiyon mantad walu’ kampung tuminindapou doid Kopointalangan om Kinopogintongan Ponukatan Ababayan Pinotomod Ponukatan Tana’ Mamasok Pogun (PANTAS) montok Zon Kilanas i pinaharo id Lintuhun Okoro’ Kampung Manikulau, di tadau Kaapat (5tw Ko’onom).
Kampung ngaawi’ nopo di nakaampai nga’ Kampung (Kg.) Manikulau, Kg. Paka Ulu Sugut, Kg. Kilanas, Kg. Giring Ulu Sugut, Kg. Patau, Kg. Kuala Patau, Kg. Tambaliwan om Kg. Kawiyan.
Ababayan dilo’ pinoimagon di Kumoduo Boyoon Montiri po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam.
Dr. Joachim tuminabi’ dilo’ mogigiyon kampung ontok kinorikotan doid Lintuhun Okoro’ Kampung Sinuau montok pamaramaian Ramai Kaamatan kampung dilo’.
Kopointalangan pinatahak di Upisor Momuhu Asil Tana’ Watas Ranau, Jaidi @ Adrian Gulis, miampai Mongunguhup Monunukat Watas po nogi’ Upisor Mananamong Upis Monukat Ranau, Sharil Waly.
Hontolon kopio nopo kopointalangan PANTAS diti nga’ montok mongilo kogugunaan, kosigompoton om kaantakan ‘risiko’ mogigiyon maya’ ponimungan kointalangan di poingongkop.
Inggisaman diti oponsol montok papatantu’ koinsanai koponguhupan nogi’ palan koburuon kaanu poindalanon miampai kohunung om kiwaya’.
Dr. Joachim minonopuk ponokotanda’ kinopoimaganan pamaramaian Kaamatan Zon Kilanas id Lintuhun Okoro’, Kampung Manikulau.
Kohondot dilo’, lobi 1,000 upalai kopohompit ponukatan tana’ maan patahako’ kumaa Koupisan Tana’ om Monunukat Watas Ranau montok laang potilombus id siriba’ inggisaman PANTAS.
Talib nopupusan kopointalangan dilo’, id ababayan sopisuai i Dr. Joachim i po nogi’ Montiri Koporintaan Koiyonon om Pomuwalaian minooi ruba’ mogigiyon kopihondot pamaramaian Tadau Kaamatan i ramaion tikid toun koponongkounsikohan asil nomot.
Dr. Joachim (wanan) minamaramit tandamato mantad di Molohingon Kampung, Kg. Kawiyan, Pitrus Oringgit i po nogi’ Luguan Balai Adat Mukim Kawiyan om sinasi’ dio’ Jaidi (id tohuri, gibang) om i Sharil.
Karamaian diti kopoinggirot nogi’ kinoulunon om tungkusan koubasanan mogigiyon Kadazan Dusun Murut om Rungus (KDMR) id Sabah.
Ponorikohon Manganjur, Luguan Mamasok Pogun (KAN), Aini Tampig minongunsikou nogi’ kumaa di Dr. Joachim mantad kinasagaan disio ruminikot.
Ka disio, kinorikotan di Kumoduo Boyoon Montiri dilo’ kopokito sokodung ogirot kumaa koburuon id nayatan siriba’ om kopoinggirotan koubasanan mogigiyon nokoiyonon.
Dr. Joachim (kotolu, gibang) pinopoindalan kinopoimaganan Ramai Kaamatan Nayatan Kampung Lobou Timbua.
Talib dilo’, i Dr. Joachim tuminindapou nogi’ do Ramai Kaamatan Nayatan Kampung Lobou Timbua i pinaanjur id balairaya kampung om monongkirumo miampai tongo’ mogigiiyon do hilo’.
Naamot di tadau Kolimo (ko 6tw Koonom) i Dr. Joachim tuminindapou om ruminuba’ mogigiyon kampung id Ramai Kamaatan doid Lintuhun Okoro’ id Kampung Sinurai.
Suai dilo’, ruminuba’ nogi’ isio di tongo’ komulakan id Kampung Tanid Melinsau montok pinapaharo piuhotan simbar karait kogompitan komulakan id kaparagatan pomutanaman do hilo’.
Nokotindapou nogi’ i Monunurat Pulitik kumaa di Dr. Joachim i Yubidi Gompoyo; Lansanon Koburuon Mogigiyon (PPM) Dounis Sani; tongo’ Mobi’ Luguan Mamasok Pogun (WKAN), Molohingon Kampung om Ponorikohon Puruankuasa’ Komogoton om Koumoligan Kampung (JKKK).
