Hajiji (kaapat, wanan) miampai di Jahid, Joniston, Jasnih om Madius pinopowonsoi ‘gimik’ kapatahaknan sapi’ polubukon montok pinopoimpuun Ababayan Ibadah Korban Nayatan Longkod Upis Pulis Watas (IPD) Tuaran kopihondot pamaramaian Aidiladha.
KOTA KINABALU: Boyoon Montiri i po nogi’ Ponorikohon Gabungan Rakyat Sabah (GRS), Datuk Seri Haji Hajiji Haji Noor minoboros, kukumaraja’ pomilian agayo GRS nokounda’ no montok monoguang Pomilian Agayo Pogun (PRN) ko-17.
Ka disio, pipiro kinopoindalanan kurusus id tikid watas om Lintuhun Undangan Pogun (DUN) Sabah nakaharo no montok koponoguangan pomilian agayo.
“Nunu i atalang, GRS nokounda’ no. Nokoponuridong tokou no do kukumaraja’ pomilian agayo om nakapaharo no do pipiro kurusus montok monoguang pomilian agayo.
“Poingkuro po, haal pogi’ikidan ginumu’ timpohon amu’ po nopogibabarasan,” ka disio katalib pinopoindalan Ababayan Ibadah Qurban Nayatan Longkod Upis Pulis Watas (IPD) Tuaran 2025, do hiti di tadau baino’.
Id ababayan dilo’, i Hajiji miampai di Montiri Koburuon Labus Kakadayan, Datuk Jahid Jahim i po nogi’ ADUN Tamparuli, Monguhup Montiri Ponombuluyan, Koubasanan om Sandad Posorili’, Datuk Joniston Bangkuai po nogi’ ADUN Kiulu, ADUN Pantai Dalit, Datuk Jasnih Daya om Puru Parlimen Tuaran, Datuk Seri Wilfred Madius Tangau miampai ‘simbolik’ pinapatahak sapi’ polubukon kuminaa di Luguan Pulis Watas Tuaran, Superintenden Noraidin Ag. Maidin.
Karait pamaramaian Aidiladha, kalansanan di Hajiji Tadau Agayo Aidiladha diti koowit ogumu’ kopurimanan kumaa rayat kosuul no tulun Islam montok miuhup om katama’ lumubuk montok koundaran oinsanan.
“Iti sabab no id pamaramaian Tadau Agayo Aidiladha diti, kolubukan okon ko’ kopohompit nopo do tayam nga nogi’ id tikid koposion tokou sabaagi tulun diti nuru’ do kiponimbangan, miuhup om katama’ lumubuk montok koundaran tokou toinsanan,” ka disio.
“Iti karati do nuru’ tokou poposuul pisompuruan om nogi’ timpu dumontol rayat i orukut tinaru id pogun diti,” ka disio kawagu.
Nokopogulu, i Hajiji pinopoindalan solat sunat Tadau Raya Aidiladha id Masjid Haji Noor Kampung Serusop miampai kikiro 1,000 jemaah.
