Hajiji miampai nangaalap suai pinopowonsoi ‘gimik’ Kopohimogonan Kopoimpuunan Kopoingkawasan Rontob Watas Poinponu’ Sook.
SOOK: Koporintaan pogun i binuruan do Gabungan Rakyat Sabah (GRS) om Pakatan Harapan (PH) Plus okon ko’ mamalan nopo nga’ pinopoindalan ogumu’ inggisaman koburuon id sunduk ikonomi om nogi’ montok kasasanangan rayat, ka di Boyoon Montiri, Datuk Seri Haji Hajiji Haji Noor.
Kohondot dilo’ ka disio, totondos pembangkang do kaka koporintaan GRS-PH Plus amu’ nokoowit nunu-nunu kinoburuon id pogun diti nopo nga’ amu’ otopot. Ilo’ nopo nga’ pagkakaa diolo’ i toririmo mogolim tikid kinalantaion i noowit do koporintaan, ka disio kawagu.
Hajiji suminain plak ponokotanda’ Kinopoimpuunan Kopoingkawasan Rontob Watas Poinponu’ Sook.
“Nga’ amu’ tokou kumadaada’, nga’ tumilombus kumaraja’ montok koburuon pogun om rayat. Mogisusuai inggisaman ponguhupan pinatahak kumaa rayat kosuul no kumaa tangaanak id nayatan paganakan B40 i nakaanu minongoput pinsingilaan kumaa kotinanan pinsingilaan akawas (IPT).
“Wookon ponguhupan dilo’ nopo Ponguhupan Tusin Porojistoran IPT (BUDI) om Ponguhupan Tusin Pinotomod Poporisaan (BAKTI), Ponguhupan Ihsan Komputer (BAIK) suai ko’ ponguhupan subsidi tikit pontuludan susumikul Sabah (GRS-SUBFLY) kiginumu’ RM600 kumaa susumikul i poinsikul id Semenanjung om Sarawak nogi’ Toluod Mahasiswa Pinsingilaan Akawas Suang Pogun (SENTOSA) kiginumu’ RM300.
“Iti nopo nga’ wookon mantad di kikiro 13 inggisaman id Ponguhupan Balajaran Koporintaan Pogun kumaa tongo’ susumikul i kosudong id pogun diti,” ka disio id Ramai Kinopoimpuunan Kopoburuan Rontob Watas Poinponu’ Sook id luan Linimput Urusetia Watas Sook, do hiti di tadau baino’.
Hajiji pinapatahak Ponguhupan Tusin Ihsan (BWI) koporintaan pogun kumaa tongo’ mamaramit.
Hajiji minoboros, inggisaman suai i pinatahak nogi’ kumaa rayat rayat amu’ songkuro kikosukupan do toun diti kaampai no pinonuridongan kiginumu’ 3,000 unit Walai Mesra SMJ id oinsanan 73 watas Lintuhun Undangan Pogun (DUN) kopohompit kos soginumu’ RM250 riong.
Ka disio, ponguhupan kaawagu i pinatahak koporintaan pogun minimpuun toun diti nopo nga’ Ababayan ‘Sentuhan Kasih Rakyat’ (SYUKUR) i nakapanahak koundaran kumaa kikiro 100,000 mamaramit id Sabah, kosuul no Luguan Suang Walai (KIR) mosikin om ‘miskin tegar’ kosudong mamaramit ponguhupan tunui RM300 sombulan gisom koompokon toun.
Karait kobolingkahangan waig, lotirik om talun-alun i sasaru’ silihon boboroson do pembangkang, Boyoon Montiri minoboros, koporintaan minamaramit kobolingkahangan i tinungkusan, nga’ toririmo minggisom montok monoibau om manalasai kobolingkahangan dilo’.
Kohondot dilo’, ka disio soginumu’ 13 projik koburuon waig kiwaya’ akawas nokoindalan om mamaso poindalan sabaagi laang timpu anaru montok papatantu’ pangaba’ waig id pogun diti korungod. Wookon projik dilo’ nopo nga’ Skim Pangabaan Waig Tawau Fasa 3, Ponuridongan Loji Pongubatan Waig Kundasang, Pamansaian Loji Pongubatan Waig Wagu Semporna, Skim Pangabaan Waig i Lahad Datu Fasa 1 om Pomoruhangan Ginumu’ Loji Pongubatan Waig Telibong II.
“Naamot dilo’, projik pomoruhangan ginumu’ Loji Pongubatan Waig (LRA) Kogopon Fasa Duo id Papar, kopohompit karaja’ ngaawi’ koponginsonongan rontob ginumu’ mantad 40 riong liter sanganu (JLH) kumaa 80 JLH, i pikikiro opongo do 2026,” ka disio.
Hajiji sinuau dilo’ tongo’ Upisor Watas id kinorikotan diti doid Ramai Kopoimpuunan Kopoingkawasan Rontob Watas Poinponu’ Sook.
Kokomoi di kobolingkahangan pangaba’ lotirik, ka di Hajiji, mogisusuai inggisaman winonsoi kaampai pinopoindalan Projik Hidroelektrik Ulu Padas i kopongimbulai ginoris lotirik soginumu’ 187.5 megawatt (MW) om Kounsol Ginoris Sabah i pinopolulus somok 1,000 MW ginoris lotirik i koimbulai maya’ pipiro projik kopongimbulaian lotirik montok mongingkawas kogunoon ginoris id pogun diti.
“Projik dilo’ okon nopo ko’ montok monoibau kobolingkahangan pangabaan lotirik id Sabah, nga ilo’ wookon inggisaman panalasaian timpu anaru di ogirot kumaa pogun diti,” ka disio kawagu.
Hajiji minoboros, lobi po kogumu’ koburuon i owiton kumaa pougn diti om di kaawagu pinoilo isio do soginumu’ apat mantad 16 pakej Fasa 1A Projik Ralanagayo Pan Borneo Sabah naanu minomongo, om noolu’ 12 pakej po masaan id pamansaian, miampai kinoburuon soginumu’ 81.7 pihatus kinopongoon.
“Oinsanan diti nopo wookon inggisaman i nokoindalan om mamaso poindalanon tokou. Nunu i nowit tokou diti amu’ insan powonsoiyo’ pogulu diti. Lobi kogumu’ po koburuon i owiton kumaa pogun diti montok koburuon om kasasanangan rayat nung onuan tokou po kawagu do mandat,” ka disio.
Hajiji minoboros, montok watas Sook pipiro projik koburuon noondo aparagat poindalanon kaampai duo projik kapamansaian talun-alun kitiir ilo’ nopo nga’ Ralan Sinaron, Sook kumaa Ralan Linayukan, Tongod kisinoru’ 40km nogi’ Ralan Rancangan Belia Tiulon, Sook kisinodu’ 22.85km i sopipoopori kigatang rM320 riong om RM127 riong i noondo masaan id kopoindalanan.
Minoboros isio, miampai haro ralan notiir diti, kopogkikit ilo’ do timpu om kos pamanahan suai ko’ kopongunsub kosunion ikonomi nokoiyonon.
Karait do haal koburuon balajaran, ka disio, soginumu’ apat tinan sikul nga’ masaan nogi’ id koponuridongan ilo’ nopo nga’ Sikul Kabansaan (SK) Ambual, SK Rancangan Belia Tiulon, Sikul Mananga’ Kabansaan (SMK) Dalit nogi’ SMK Trusmadi i modingkopongo no.
Naamot, projik monginsonong klinik kolidasan om projik Kapamansaian ‘Pencawang Pembahagian Utama’ (PPU) Sabah Electricity nopongo nodi toun nakatalib.
Iti kopohompit Klinik Kolidasan Sook i kigatang somok RM1 riong nogi’ Klinik Desa Karamatoi om Kolinik Desa Marapok i sopipoopori kigatang RM600,000.
“Naamot, soginumu’ 120 mogigiyon nakaramit koundaran Walai Mesra SMJ mantad di toun 2022 gisom toun 2024 i kigatang somok RM9.6 riong id Sook. Do toun 2025, koporintaan pogun pinopoobi’ soginumu’ RM6.4 riong montok monuridong 80 tinan walai SMJ montok Sook,” ka disio.
Hajiji minoboros, ogumu’ po koburuon i owiton kumaa Sook do timpu dumontol i kapanahak koundaran kumaa mogigiyon id watas diti miagal ponuridongan kompleks sipoot, walai pongubatan watas Sook, balai pulis watas om momoruhang ginayo koiyonon koliniki kolidasan Sook.
“Tikid koburuon i owiton kopokito kinotopoton koporintaan pogun babaino’ diti do mongobi’ konosipan rayat om mogowit Sabah kumaa koburuon di lobi kotunda’, oulud om aadang,” ka disio pinoposotol.
Kopihondot ramai dilo’ pinopolulus nogi’ isio kopoobian soginumu’ RM2 riong montok ponuridong Lintuhun Poingukab Watas Sook om monginsonong Linimput Urusetia Watas Sook.
