Haji Hajiji Haji Noor
KOTA KINABALU: Yayasan Sabah (YS) i tinuridong di toun 1966, nakapapapanu tonggungan di atalang id kinopoburuan mogigiyon pogun diti, lolobi no id kaganana balajaran, sosial om ikonomi.
Boyoon Montiri, Datuk Seri Haji Hajiji Haji Noor minoboros, id haal balajaran, YS nopo nga’ popogura’ monimpuun kopoburuan balajaran mintonod mantad nayatan balajaran ‘prasikul’ gisom id kotinanan pinsingilaan akawas.
Minoboros isio, okito iti miampai kinoingkawason kousinan balajaran soginumu’ 86.38 pihatus kuminaa RM67.17 riong di toun 2024, nung piadangon di RM36.04 riong di toun 2021, i nakapasaga’ soginumu’ 3,234 tulun susumikul nakaanu koundaran mantad sikulasip om kapangalasan balajaran YS.
“Tabung Balajaran Pogun Sabah (TPNS) i pinointutunan di toun 2022, nakapanahak koundaran kuminaa 7,957 tulun susumikul miampai pabalanjaan soginumu’ RM7.07 riong,” ka disio ontok Sodop Gaa’ Tinimungan Yayasan Sabah id Longkod Konvensyen Sompomogunan Sabah (SICC) do hiti di totuong baino’. Teks boboroson disio binasa’ Speaker Lintuhun Undangan Pogun (DUN) sabah, Datuk Seri Kadzim M. Yahya.
Boyoon Montiri minoboros, miampai koinsanai YS nga’ nokouhup minongingkawas rontob om naangayan koposion mogigiyon maya’ tongo’ kaparagatan doun mogigiyon, miampai pinopoobi’ soginumu’ RM75.88 riong i pinabalanja montok ababayan sosial di toun 2024, nokoingkawas soginumu’ 86.57 pihatus nung piadangon di RM40.67 riong di toun 2021.
Mokianu isio pomuhuan bayaran kawagu noolos tilombuson popogoris, nosusuhut ginumu’ nopuhu nokoingkawas kuminaa RM6.6 riong di toun 2024, nung piadangon pulampai nopuhu montok tolu toun pogulu diti kiginumu’ RM5.4 riong, montok papatantu’ lobi kogumu’ tangaanak Sabah kikosiwatan mongoput balajaran diolo’.
Hajiji i po nogi’ Ponorikohon Kotinanan Mongingigit Tonggungan YS, nga’ mokianu Kolej Tiknologi Yayasan Sabah (KTYS) om University College Sabah Foundation (UCSF) tumilombus popoinlipat inggisaman id kopouyuhan mogisusuai kurusus di kosudong do kogugunoon ginoris id pogun diti.
“Pointonod tinuridong 10 toun nakatalib, UCSF nakapanahak koundaran kuminaa lobi 3,000 tangaanak Sabah, naamot KTYS nokopokito kinoinsawaton id kinosuangon om tonggungan kohondot balajaran tosonong id Sabah. Koporintaan pogun tumilombus monokodung do goduduo kotinanan balajaran diti montok timpu dumontol tangaanak pogun diti,” ka disio.
Karait naangayan komersial, ka id Hajiji, Tinimungan Innoprise Corporation Sdn. Bhd. (ICB) nakalantoi pinoposurat naangayan abantug i nokouhup kuminaa kinoingkawason pambayaran dividen kumaa YS solinaid tolu toun otuntud, ilo’ nopo nga’ soginumu’ RM87.87 riong di toun 2021 om kakal id rontob di akawas miampai ginumu’ RM146.52 riong id toun 2024.
Ka disio, ICSB pinopoilo nogi’ pambayaran dividen kuminaa YS om koporintaan pogun Sabah soginumu’ RM150 riong, i po nogi’ wookon mantad GLC koporintaan pogun i pinopoimagon dividen bobos akawas montok apat toun otuntud.
Hajiji minoboros, id sambalik kaantaban i potoguang, Tinimungan ICSB nakalantoi pinoposurat kinoingkawason kountungan tinimungan soginumu’ RM102 riong, nokoingkawas soginumu’ 22 pihatus kuminaa RM562 riong di toun 2024, nung piadangon di RM460 riong id toun 2023.
“ICSB sabaagi komponi nopo nokoposurat kountungan pogulu sukai soginumu’ RM158 riong montok toun 2024, ilo’ nop onga’ RM4.1 riong lobi kakawas ko’ mantad di toun 2023. Kalansanan ku inggisaman potilombuson montok papatnatu’ tongo tanak komponi kotilombus kiginoris tumopong montok mongingkawas kountungan om potilombus dino popilipat pambayaran dividen,” ka disio.
Mokianu nogi’ isio YS kobulun do popowonsoi kosimbanon poinpuli kumaa kaparagatan soisal om komersial, nogi’ popowonsoi kosimbanon i mongingkanan ‘kreativiti’ om ‘inovasi’ wagu, i kaanu monigampot soindikoton om angkabon mogigiyon.
“Mogisusuai ababayan kiguno tilombuson popoindalan kaampai mongukab kaganaan wagu miagal kolidasan om ginoris aanu inwoguan kosuul no solar montok kountungan timpu anaru,” ka disio.
