Hajiji Haji Noor
KOTA KINABALU: Koporintaan Pogun nokopongintutun Tisan Kosilahon Sabah sabaagi hab kosunion ikonomi di wagu nosusuhut kinoiyonon dilo’ id doros do Watas Kosunion ASEAN Kosilahon (EAGA) di suai, ka di Boyoon Montiri (KM), Datuk Seri Hajiji Haji Noor.
“Kotinnaan pogun miagal POIC Sabah Sdn Bhd i pinopo’iliu taman pomorunan om dodopiton dau id Lahad Datu sabaagi hab ‘logistik’ montok BIMP-EAGA.
“Palan nga’ pinosodia’ monotk monuridong akademi maritim montok monokodung ikonomi EAGa i tumalahan kumaa maritim om hab padsakaian marin montok mongingkawas kopiromutan doid EAGA,” ka disio id ababyaan makan doungotuong minonuau om kinopongukaban pohimagon Ekspo Sompomogunan Sabah (SIE2023) id Longkod Konvensyen Sompomogunan Sabah (SICC) do hiti di songkosodop. Boboroson disio binasa’ di Montiri Kousinan, Datuk Seri Masidi Manjun.
Hajiji minoboros kawagu do sabaagi somboogian mantad BIMP-EAGA (Watas Kosunion ASEAN Kosilahon Brunei Darussalam-Indonesia-Malaysia-Filipina, Sabah id koiyonon di kosudong.
“Sasabab no do BIMP-EAGA sumosodia’ montok mamaramai kouliton toun dau di ko-30 toun tiso, kiguno yahai maganu kokiraan kosiwatan dilo’. Data kokomoi BIMP-EAGA popouyu ogumu’ kosiwatan.
“Haro ogumu’ kosiwatan id pisokodungan padarapan piwolitan doid siktor i pinosodia’ miagal do padsakaian; ginoris om kopiromutan kuasa; pidagangan om kopoopuan; tiknologi kopointalangan om komunikasi; ‘agroindustri’ om ponginsadaan; ponombuluyan; sandad posorili’ om sosio koubasanan om balajaran.
“Suai ko’ Brunei, puru EAGA suai osodu’ mantad longkod pogun diolo’ id Jakarta om Manila. Mantad dilo’, Sabah kosudong sabaagi waya’an sumuang montok pidagangan om kopoopuan,” ka disio.
Boyoon Montiri minoboros, ponuridongan longkod pogun Indonesia wagu, Nusantara id Kalimantan Kosilahon, kopongingkawas do kosuulon Sabah.
“Kotimungon tulun om pongindopuan kumaa Borneo koponoruntud kosunion ikonomi. Koporintaan pogun otumbayaan mangangapu’ suang pogun om sompomogunan kaanu mongukab ‘subrantau’ diti miampai pidagangan lobi 70 riong moomoguno om koinggayo,” ka disio.
Daamot dilo’ i Hajiji minoboros, Sabah otumbayaan kaanu lobi kogumu’ kopoopuan kiwaya’ akawas om kosindak lobi kosodu’ katalib kinopoopuan RM9 bilon i pinolulus id pintangaan kumolimpuunon toun diti.
“Toun nakatalib, dagangan Sabah nokosigampot rikod bobos akawas RM118.1 bilion nung piadangon di RM87.2 bilion di 2021. Tantu’ do dahai orohian kokito lobi kogumu’ mangangapu’ rumikot id Sabah montok mongimbulai lobi kogumu’ pongindopuan i kikoundaran kumaa toinsanan,” ka disio.
Hajiji minanahak jominan do tumanud palan hontolon kopoburuan, Hontolon Sabah Maju Jaya, tonggungan Sabah kohondot kosunion amu’ no opiduo ginawo po, om ilo’ kotilombus kounsub ababayan kopoburuan dau tumanud tolu tukod kosunion ilo’ nopo Pomutanaman, Pomorunan om Ponombuluyan nogi’ manahak koposotolan kumaa kopoopuan suang mogigiyon, mongingkawas kopiromutan om kotilombuson otomou.
