Hajiji tinanud di Kumoduo Montiri Sains, Tiknologi om Inovasi, Datuk Arthur Joseph Kurup om Luguan Eksekutif Bohogian Kikuasa’ Kopoburuan Ikonomi om Kopoopuan Sabah (SEDIA), Datuk Seri Hashim Paijan minooi intong pokikitanan tiknologi dron katalib pinopowonsoi gimik kinopoimaganan “Sabah Drone Open Day 2023” id SICC, Kota Kinabalu, di tadau baino’.
KOTA KINABALU: Koporintaan Pogun mongunsub komponi om pomorunan poinggompit pomutamanan, pomorunan om ponombuluyan id pogun diti do papasarabak pomogunaan dron id kopoindalanan tadau-adau, ka di Boyoon Montiri (KM), Datuk Seri Hajiji Haji Noor.
Ka disio, iti mooi do kaanu yolo’ koburu’ kopiongoi di kinoinwoguon tiknologi maso-maso.
Tumanud disio, kinoburuon tiknologi dron kiguno do gunoon miampai osikap di tongo’ popopoindalan pomorunan, sabab tiknologi dilo’ kiharo pomogunaan di poinggayo om kaanu manalasai pipiro hal do osikap, kaampai no kokurion ginoris karaja’ id siktor pomutanaman.
“Okunan tokou do pomogunaan tiknologi dron id suang ikonomi Sabah kiharo somuli’ di agayo montok koburuon om komogoton pogun tokou. Poingkuro po, momoguno ilo’ do pisokodungan mantad oinsanan bohogian kikosuulon-koporintaan, papapamanau pomorunan, ponolidik om mantad mogigiyon sondiri,” ka disio ontok pinopoimagon “Sabah Drone Open Day 2023” id Longkod Konvensyen Sompomogunan Sabah (SICC), do hiti, di tadau baino’.
Boyoon Montiri minoboros, dron nosili wookon mantad tiknologi wagu, om pomogunaan dilo’ nokoinggayo aparagat padarapas mogisusuai pomorunan, mantad pomutanaman kumaa kogogonopan, mantad surupukaraja’, kapaatadan kumaa kapanamangan sandad posorili’.
Tumanud disio, dron nga’ koponguhup doid kopotontuan pomogompitan ‘ekosistem’ di oromuk montok sinakagon dumontol om mononduli’ gompi’ rizab sandad pogun diti i oponsol montok ponombuluyan om ponondulian gompi’ sandad posorili.
“Ilo’ nopo nga’ iso’ kaganaan wagu i mositi’ gunoon om tantu’ no dati’ id bohogian koporintaan mongunsub om nogi’ orohian popoinsanang karalano’ kumaa koburuon om kopoinggayaan kaganaan dron diti.
“Sundung kooturan koumoligan om kooturan dron oponsol montok tonudon mooi papatantu’ pomogunaan dron di kitonggungan om oumolig, nopo nga’ miagal koponsol do tongo’ kooturan diti amu’ kaantob kosiwatan pomogunaan dron id siktor ikonomi tokou,” ka disio kawagu.
Minoboros i Hajiji, id timpu di nounsub do koburuon tiknologi aparagat, oponsol montok oinsanan kopuriman koponsolon tiknologi id kopoingkawasan ikonomi mogigiyon miampai poinpuli.
Ka disio, Sabah nawanadan do pinuawang intodonon sandad, tungkusan koubasanan, om pomorunan ponombuluyan i asarok amu’ apatut oiduanan id pigusaan montok koposudongan tiknologi do papatantu’ kosunion di po’ompus om kiginaras monokitopong id siktor ikonomi.
“Oponsol montok dati’ do monokisolod om monongkiahou kosiwatan di pinouyu do tiknologi i hinombo do kopongukab ilo’ do ralan kumaa kopogisusuaian, koingkawason asil, kopoimbulayan pakarajaan om koburuon di po’ompus.
“Mantad dilo’, oponsol tokou do poposodia’ ginoris karaja’ montok papagaras timpu digital maya’ inggisaman kopoingkawasan komilaan,” ka disio pinoposotol.
Hajiji minoboros, tiknologi om inovasi i nosili ginoris popogura’ id kosunion om koburuon ikonomi i koposimban pomorunan, koponginsonong karalano’ pongindopuan noubasanan om koponsupu’ kosiwatan wagu montok mongungusaha’ om pakarajaan.
“Lolobi podii, kopongimbayat ilo’ kopoopuan om koposuni kousahawanan miampai poposodia’ impohon montok sukod wagu om inggisaman nindapu di inovatif montok mimang buru’. Iti potilombus dino koponguhup kumaa kopongimbulayan tongo’ kosiwatan pakarjaan, kosunion ikonomi om monuridong rontob koposion di lobi kosonong montok koinsanai mogigiyon. Tiknologi nosili kakamot montok dati’ monuridong pomogunan di lobi kosonong montok dati’ do babaino’ om montok sinakagon dumontol,” ka disio pinoposotol.
Ka disio, kopongonjuran “Sabah Drone Open Day 2023” kopokito iso’ kaantakan oponsol montok mongukab kosiwatan agayo dron om poingkuro dron kaanu poposimban ikonomi Sabah.
