KOTA KINABALU: Koporintaan pogun mambayar Ponguhupan Pinotomod Kousinan soginumu’ sombulan gaji toi bobos osiriba’ RM2,000 kumaa koinsanai pakakaraja’ koporintaan Sabah, kaampai i ki’oitan ‘kontrak’, VOT Poingukab om pakakaraja’ naamot tadau-adau do toun 2026.
Montiri Kousinan, Datuk Seri Masidi Manjun minoboros dilo’ ontok pinapawalad Bajet Sabah 2026 id Pitimungan Lintuhun Undangan Pogun (DUN) Sabah di tadau baino.
Pinosotol disio do laang nopo diti nga’ kopongunsikohan koporintaan kumaa kinouhupan pakakaraja’ koporintaan sabaagi niawa agayo koporintaan pogun.
“Ponguhupan pinotomod diti kopohompit 18,853 pakakaraja’ koporintaan om bayaran id duo fasa, ilo’ nopo pogulu Tadau Raya Aidilfitri do wulan Koduo om pogulu kapamaramaian Kaamatan toun 2026,” ka disio pinopointalang.
Ka wagu di Masidi, ponguhupan miagal nga’ patahakon nogi’ kumaa pinsin koporintaan Sabah kiginumu’ RM1,000 sabaagi tanda’ pongunsikohan kumaa surupukaraja’ diolo’ kumaa pogun.
Suai dilo’, koporintaan pinopoobi’ RM7.6 riong montok mongunsub pinsingilaan po’ompus id nayatan pakakaraja koporintaan, sabaagi inggisaman monuridong nuludan upisor di kitoilaan, kikomilaan akawas nogi’ pasanganu ginoris ‘analitikal’ om kopomuruanan timpu dumontol.
Soginumu’ RM16.85 riong nga’ pinoikid kumaa koinsanai kotinanan koporintaan Sabah id siriba’ koburuon intodonon tulun (sumber manusia) montok papatantu’ pakakaraja’ koporintaan noluda’, opulokis om noinggonopan toilaan nogi’ komilaan monoguang kaantaban maso-maso.
Masidi pinoposotol do Surupukaraja’ Koporintaan Sabah nopo nga’ toruntud pomorintaan koporintaan pogun.
Laang ngaawi’ diti kituduan papatantu’ pakakaraja’ koporintaan toririmo kiginoris monokitopong, kiwaya’ om kaanu papatahak surupukaraja’ bobos osonong kumaa rayat.
“Koporintaan tumopot id kopongunsikohan kinouhupan pakakaraja’ koporintaan om monginggirot koburuon intodonon tulun di osonong, montok mamajamin kopomorintaan pogun kotilombus kapanau miampai opulokis om kiwaya’,” ka disio.
