KOTA KINABALU: Montiri Kousinan, Datuk Seri Masidi Manjun di tadau baino’ pinapawalad Bajet Sabah 2026 kiginumu’ RM6.402 bilion, i insan po nokopokito nindikohon fiskal pogun id nimpohon di ogirot miampai nokoposurat bajet lobian RM28 riong.
Minoboros isio, bajet dilo’ nulud mimpau angkab koporintaan montok poposindak koburuon pogun miamapi lobi kosikap om poinpuli, kopiongoi di mandat wagu katalib Pomilian Agayo Pogun i katatalib nogi’.
Ka di Masidi, limo tukod nosili impohon kumaa kinoposodiaan bajet, ilo’ nopo nga’ monginsikap koburuon siktor ‘produktif’ om nogi’ kopoopuan, monoibau amu’ kopiadasan sosioikonomi, papagaras modal insan, mongingkawas infrastruktur kapasaga’ ginoris om monginggirot kopulokison sistem kapatahakan koporintaan.
Miampai uhu “Memacu Pembangunan, Kesejahteraan Rakyat Diutamakan” (Posiau Koburuon, Kasasanangan Rayat Posuulon), ka disio, koporintaan tumopot papatantu’ tikid katatapan poindalanon miampai ‘responsif’, kiwaya’ om pointulid miampai monombol liwang kopomirubatan om kalawason.
Masidi pinapahabar pongiikiraan asil 2026 pikikiro kosigampot RM6.430 bilion, koinsiriba’ tokuri’ nung piadangon di 2025 nosusuhut katalahanan kumaa duo komoditi agayo, ilo’ nopo nga’ tumau mata’ petroleum om tumau sawit mata’ i potoguang kumaa koinsawaton koinsiribaon gatang global om rontob pialanan mato tusin.
“Sundung aantakan koinsiribaon asil komoditi mimpau petroleum, pomuhuan Cukai Dadagangan Pogun (CJN), aanu koporintaan Pisompuruan om tadon okon sukai suai pikikiro kouhup manapad koinsiribaon dilo’,” ka disio.
Montok mongingkawas kotulidon om popobobos asil, ka di Masidi, koporintaan pinopogirotkuasa’ pomogunaan gatang sukuon montok pongintoban CJN kumaa apat produk petroleum mimpuun ko 1tw Kohopod 2025, papatantu’ gatang kopotontuan kopiongoi di gatang pidagangan maso-maso.
Pinointalang nogi’ disio do inggisaman ‘agresif’ powonsoiyon montok monoibau kalawason asil maya’ Operasi Kapanamangan Pinotomod (Operasi Pemantauan Khas – OPK) miampai koupisan om kotinanan Pisompuruan, suai ko’ popodigital karalano’ pambayaran om nogi’ mongukab intodonon asil wagu padarapas koinsanai komontirian.
Rinamit poinsonong po nogi’ di Masidi kootusan Kuut Akawas i pinopoimagon kopotutan Sabah kumaa kapanahakan pinotomod 40 pihatus id siriba’ Perkara 112C om 112D Perlembagaan Pisompuruan, minongomi dilo’ sabaagi kinalantaion oponsol id ninggisaman Sabah monugat kopotutan koundangan.
Id kinopomohogian pabalanjaan, RM5.202 bilion pinoobi’ montok pabalanjaan mongulud om RM1.2 bilion sabaagi kopoopuan kumaa Tinimungan Tusin Koburuon. Pongintaban kapangabaan koinsanai toun 2026 nokoinsiriba’ tokuri’ nung piadangon toun pogulu dilo’ nosusuhut pinonguludan id pialatan pabalanjaan popoindalan om koburuon.
Montok emolumen, RM936.73 riong pinoobi’, nokoinsawat 3.63 pihatus mantad no kinoinsawaotn gaji tounan, kinoponguludan Sistem Kopinsinan Surupukaraja’ Koporintaan nogi’ pinomoruhangan koposilihan wagu. Pabalanjaan nohulit nopo nokoinsiriba’ kuminaa RM2.22 bilion, naamot pabalanjaan pinotomod nga’ nokopokito kinoinsiribaon gama-gama’ kinopoundolihan kogumuan kopoobian id siriba’ vot koburuon.
Masidi nga’ pinapahabar nogi’ kopoobian koburuon 2026 soginumu’ RM1.865 bilion – bobos akawas id sinusuyan kahandaman – miampai RM1.468 bilion tonggungon koporintaan pogun naamot RM397.21 riong nopo nga’ noolos om bayaran kawagu koporintaan Pisompuruan.
Mantad ginumu’ dilo’, RM996. 47 riong toi 67.9 pihatus pinoikid kumaa siktor ikonomi, RM345.77 riong kumaa siktor sosial, naamot RM125.40 riong kumaa siktor ‘pentadbiran am’. Minoboros isio, id siriba’ RMK-13, Sabah minamaramit siling kopoobian RM12.02 bilion montok mamalanja 1,173 projik, kaampai 943 projik wagu.
“Koporintaan moningkanan kumaa tolu siktor osuul koposiau kosunion pogun – pomutanaman, pomorunan om ponombuluyan – i nobian RM996.12 riong montok popogura’ koburuon lobi kosikap toun tiso’,” ka disio.
Masidi pinoposotol, miampai nimpohon fiskal di ogirot, koporintaan otumbayan bajet 2026 koponginsikap kobuuron pogun om kapatantu’ kasasanangan rayat toririmo kosili posuulon.
