Dr. Joachim (wanan) minampai id pamaramaian Tadau Paroki dilo’ montok kapatahakan kuminaa di Archbishop Datuk John Wong.
RANAU: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam tuminindapou Pamaramaian Tadau Paroki id Gereja St. Peter Claver Ranau (SPCR), i pinoimagond i Archbishop Datuk John Wong do hiti di tadau baino’.
Kinorikotan di Dr. Joachim sinuau di tongo’ tulun Katolik i nokotimung id luan do gereja pointonod di kosuabon baino’.
Dr. Joachim nga’ nokosiwat nogi’ do minooi rumo-rumo diolo’ ngaawi’ om suminiwat miampai di mogigiyon nokoiyonon i nokotindapou miampai poinponu’ sunduan piuludan.
Ababayan dilo’ rinamai miampai pomoridisan kek ponokotanda’ kinapamaramaian, suai ko’ minakan doungadau id Padang Sikul St. Benedict miampai tombului tapantang.
Dr. Joachim (koonom, wanan) minampai id kinopomoridisan kek i pinoindalan di Archbishop Datuk Jonn Wong (tanga’) om tombului apantang di suai.
Wookon kingaangaran di minamaramai nogi’ do ababayan dilo’ nopo nga’ ii Puru Parlimen Ranau, Datuk Jonathan Yassin; Ponorikohon Pangaramaian Pinotomod om Protokol Paroki SPCR, Georgina George om Lansanon Koburuon Mogigiyon DUN Kundasang, Dounis Sani.
Kapamaramaian Tadau Paroki dilo’ nosili timpu popigirot piuludan id pialatan lansanon om mogigiyon, suai ko’ popokito sunduan pisompuruan om piuludan mogisusuai tinaru om ugama’ id watas Ranau.
