Dr. Joachim (poindikau kolimo, wanan) guminambar miampai komulakan i tuminanud pinialaan buul tapapon dilo’ om oinsanan i nokotindapou.
RANAU: Kumoduo Boyoon Montiri II, Datuk Seri Dr. Joachim Gunsalam minokianu sukod wagu do tumilombus monokodung koporintaan Gabungan Rakyat Sabah (GRS) i buruanon di Boyoon Montiri, Datuk Seri Haji Hajiji Haji Noor montok no koturunduson om kotilombuson palan koburuon poinpuli Sondikoton Sabah Maju Jaya (SMJ).
Dr. Joachim po nogi’ Puru Lintuhun Undangan Pogun (ADUN) Kundasang minoboros, palan SMJ nokointalang do nokoowit kinalantaion id koburuon sosiol om ikonomi i nakapanahak koundaran pointongkop kumaa rayat Sabah.
“Komulakan nuru’ komilo momonsoi sumpili’ montok momusus kaadangon pulitik om koporintaan di poinharo mantad, potilombus dino momogompi’ kasasanangan om kopotutan rayat pogun diti,” ka disio ontok pinopoimagon Ramai Pomupusan Pilaaan Buul Tapapon Trofi Komulakan Poturugon Mukim Perancangan 2025 id Kampung Togis, Ranau, di konihab (6tw Kosiam).
Dr. Joachim suminain doid songinan buul om sinasi’ dilo’ suai.
Pialaan dilo’ natanud apat kampung ilo’ nopo nga’ Kampung Lampaki, Perancangan, Togis om Kampung Pinawantai.
Ka di Dr. Joachim, koporintaan GRS noondo kiharo rikod bobos osonong id pomorintaan, kaampai nokopongimbayat kinopoopuan wookon dilo’ mantad komponi China, Sabah Kibing Solar New Materials i pinopoburu’ kilang solar id Taman Pomorunan Kota Kinabalu.
“Kilang diti minongukab kosiwatan pakarajaan om pinoposodia’ pintoriningan komilaan kumaa komulakan. Kosiwatan pakarajaan id mogisuai nayatan diti kalansanan kopongingkuri’ kaangayan komulakan dati’ id Semenanjung Malaysia,” ka disio.
Minonongkounsikou nogi’ isio kumaa Ponorikohon Manganganjur Popomogot Mukim Pinawantai po nogi’ Luguan Komulakan Parti Bersatu Sabah (PBS) Raan Kampung Togis, Saiful Ruling, miampai di Ponorikohon Puruankuasa’ Komogoton om Koumoligan Kampung (JKKK) Kampung Takutan, Parvin Yudin; nogi’ Komulakan PBS Kundasang mantad kinopongonjuran pialaan dilo’ i nokoponompuru komulakan id pososorili’.
Naamot dilo’, i Saiful id boboroson disio pinopolombus kopongunsikohan kumaa di Dr. Joachim tu’ nakasaga’ pinopoimagon ramai pomupusan pinialaan dilo’ sundung pia do timpu karaja’ di opidot.
Nokotindapou nogi’, Monunurat Pulitik kumaa di Dr. Joachim, Yubidi Gompoyo; Lansanon Popomogot Mogigiyon, Dounis Sani; nogi’ Luguan Komulakan PBS Kundasang i po nogi’ Monunurat Piromutan Ginumuan (SuPA) kumaa di Dr. Joachim, i Khairol Majide Kalimin.
