Dr. Joachim (poindikau kaapat, wanan) om i John (poindikau kaapat, gibang) guminambar pongingitanan miampai puru puruankuasa’ popoindalan Mitingan Tohuri Tounan PBS Moyog.
PENAMPANG: Ponowoli Presiden Parti Bersatu Sabah (PBS), Datuk Seri Dr. Joachim Gunsalam pinoposorou sukod wagu kokusaian, koonduan om oinsanan puru PBS mooi do amu’ obingampawong di podsusudu pembangkang i komoyon disio sabaagi pinsingumbalan mamabak pisompuruan parti.
Minoboros ontok pinopoimagon Mitingna Agayo Tounan Ko-30 PBS Bohogian Moyog i nakapanu id Turongou Farmstay do hiti konihab, Dr. Joachim minogolim po nogi’ totondos do kaka disio om Presiden Parti Solidariti Tanah Airku (STAR), Datuk Seri Dr. Jeffrey Kitingan amu’ nalap kuminaa ababayan pinaanjur Kotinanan Gagasan Rakyat Sabah (Gagasan Rakyat) di kaawagu diti.
“Pinapaatod oku do minongobi’ kuminaa ababayan dilo’ tu’ ontok timpu di miagal nuru’ ku do popoimagon Mitingan Agayo Tounan limo bohogian PBS id Beaufort. Poingkuro komoyon do PBS amu’ monokodung di Boyoon Montiri dadamot ogumu’ lansanon om mobi’ PBS i nokotindapou nogi’ do hilo’?” ka disio.
Dr. Joachim (tanga’) pinopoindalan kopomutulan kek.
Pinosotol disio do PBS toririmo ogirot monokodung kopomuruanan di Boyoon Montiri, Datuk Seri Haji Hajiji Haji Noor om minokianu oinsanan puru parti tumilombus monimbaba’ kopio popoburu’ ababayan PBS.
“Kada’ kobingampawong di podsusudu do ponokisahap. ‘Stay focus’… Poburuon PBS kakal osodu’ om kakal tokou do kosudong,” ka disio pinoposotol.
Dr. Joachim (koduo, gibang) nogi’ ilo suai pinopolombus taru PBS id mitingan dilo’.
Dr. Joachim nga’ pinoposorou do koporintaan pogun noondo diti mantad no do piniuhupan id pialatan Gabungan Rakyat Sabah (GRS) om Pakatan Harapan (PH) Plus. Rinoitan disio kawagu kinaantakan duo toun nakatalib soira’ PH minanahak sokodung kumaa di Hajiji montok monilombus kaadangon pomorintaan pogun.
“GRS amu’ insan kolihu kinouhupan PH i minonokodung di Boyoon Montiri di maso haro bohogian i minggisom do papaatu’ disio. Ponokisahap momoguno nunu nopo ralan montok mongurias dati. Mantad dilo’, nuru’ tokou tumilombus misompuru,” ka disio kawagu.
Dr. Joachim nga’ minongunsikou nogi’ kumaa di Luguan Bohogian PBS Moyog, John Chryso Masabal om oinsanan puruankuasa’ mantad kinapagalapan pinopoimagon mitingan dilo’.
Ababayan dilo’ nokopokito po nogi’ kinapatahakan foom kosompuruan wagu kuminaa di Dr. Joachim om kinorikotan nuludan kopomuruanan parti kaampai tongo’ timbang presiden nogi’ Exco Koonduan om Komulakan PBS.
