Hajiji (koduo, wanan) guminambar miampai tongo’ mamaramit gaa’ Tokoh Kopomuruanan, Mohd. Zaini Yanin (gibang) om Tokoh Mongingia’, Teo Poo Siang.
TUARAN: Koporintaan pogun tumilombus monginggirot tonggungan dau id kopogorisan siktor balajaran pogun miampai pinopoobi’ lobi RM1.33 bilion montok kopoburuan ‘modal insan’pointonod toun 2021.
Boyoon Montiri, Datuk Seri Haji Hajiji Haji Noor minoboros, kaganaan balajaran kakal tingkananon koporintaan pogun kopiongoi di Sondikoton Sabah Maju Jaya (SMJ).
Ka disio, id suang timpu 2021 gisom 2024, koporintaan pogun pinapatahak RM848.26 riong montok mogisusuai upa’ koponguhupan balajaran kaampai Tabung Balajaran Pogun Sabah (TPNS) om Sikulasip Koporintaan Pogun Sabah (BKNS), suai ko’ RM485 riong kosuul montok koburuon modal insan.
Ka disio, kiginumu’ 14 inggisaman wagu nga’ pinoindalan nogi’ mantad toun 2021 gisom 2025, kopohompit kopoobian soginumu’RM164.14 riong om nakapanahak koundaran kumaa 210,918 susumikul.
Minoboros isio, wookon inggisamannopo dilo’ nga Ponguhupsan Subsidi Tikit Pontuludan Susumikul Sabah, Toluod Mahasiswa Balajaran Akawas Saalom Sabah (SENTOSA), Ponguhupan Ihsan Komputer (BAIK) om Ponguhupan Tusin Rumojistor IPT (BUDI).
Koinsanai inggiasman diti kituduan monginggaan tonggungan kousinan molohing om susumikul nogi’papagarqas piromutan balajaran osonong kumaa tanganaak Sabah,” ka disio ontok pinopoimagon Ramai Kopongunsikohan Ponguludan Sikul (MAPenS) Nayatan Pogun Sabah Ko-3, Toun 2025 id Lintuhun Seri Sulaman do hiti di baino’.
Ka di Hajiji, montok monumboyo’ kopokionuan pidagangan karaja’ timpu dumontol, koporintaan minonuridong Kounsol TVET Pogun Sabah (MTS) do tulan Kolimo sabaagi laang kosudong mongulud lobi 160 kotinanan pintoriningan teknikal om vokasional id pototongkop Sabah.
Ka disio, koporintaan pogun nga’ pinopouyu ponguhupan tusin RM1,000 kumaa 146 susumikul osonong naangayan STPM 2024 om RM3,000 kumaa songulun susumikul Sabah i osonong naangayan id nayatan kabansaan.
“Naangayan osonong susumikul ngaawi’ nopo diti nga’ kokitanan mantad ninggisaman poómpus, kinopinogoton tongo’ mongingia, sokodung molohing nogi’ waya’sinonong sistem balajaran tokou,” ka disio.
Ka disio, naangayan susumikul Sabah id Setifikit Balajaran Malaysia (SPM) 2024 nokopokito nogi’ kinoingkawason kounsub soira’ Gred Pulampai Pogun (GPN) nokoingkawas kuminaa 5.00 mato nung piadangon di 5.09 di toun pogulu dilo’.
Pinokianu disio oinsanan mongingia’ do tumilombus popokito tonggungan, kinotulidon om poinponu’ ginawo id kopoindalanan tonggungan sabaagi mongingia’ kumaa tanganak id pototongkop Sabah.
Hajiji minoboros, MAPenS Ko-3 onjuran Koupisan Balajaran Pogun dilo’, nokoponimung tongo mongingia’ mantad pototongkop pogun do minamaramai kinosonongon ponguludan sikul nogi’ minanahak kopongunsikohan kumaa tongo’ mongingia’ kinaangayan akawas.
“Ramai diti agayo kopio rati dau tu’ kapangakun ilo’ di tonggungan nogi’ kinouhupan puru mongingia’. Kopongokunan diti okon ko’ ponokotanda’ nopo tomod, nga kosili pongunsub kumaa koinsanai mongingia’ om mongungulud do tumilombus papabantug balajaran id Sabah,” ka disio.
Minongunsikou nogi’ isio kumaa Tokoh Mongingia’ om Tokoh Kopomuruanan i ginaán id ramai dilo’.
Ka disio, kopongokunan nopo dilo nga’ tanda’ pamantangan kumaa karaja’, kolubukan om tonggungan agayo puru mongingia’ id koponuridongan sinakagon timpu dumontol.
