Dr. Mohd. Arifin minonuntung tagung ponokotanda’ kinopoimaganan Mitingan Toun-toun Gagasan Rakyat Bohogian Karambunai, do hiti di baino’.
KOTA KINABALU: Lobi 10,000 susumikul nakaramit koundaran Tabung Balajaran Pogun Sabah (TPNS) montok monguhup momogutas yuran pinsingilaan diolo’ id nayatan univositi koporintaan om swasta doid pomogunon diti.
Montiri Sains, Tiknologi om Inovasi, Datuk Dr. Mohd. Arifin Mohd. Arif, minoboros gisom noondo diti koporintaan pogun napapabalanja’ somok RM13 riong kumaa TPNS pointonod dilo’ do pinoimpuun di duo toun nakatalib.
Ka disio, iti kopokito tonggungan di Boyoon Montiri, Datuk Seri Haji Hajiji Haji Noor id kapanahakan pomodulianan kosuul kumaa siktor balajaran id pogun diti.
“Mogisusuai inggisaman balajaran suai nga’ nonuan nogi’ do koposuulan di Boyoon Montiri kaampai Sikulasip Koporintaan Pogun Sabah (BKNS) mantad RM50 riong pinoingkawas kuminaa RM125 riong kosuul no montok monguhup tangaanak Sabah.
“Iti amu’ kaampai Sikulasip Yayasan Sabah nogi’ inggisaman balajaran suai kiginumu’ RM74 riong pinatahak kumaa siktor balajaran id pogun diti,” ka disio.
Minoboros isio dilo’ ontok pinopoimagon Mitingan Toun-toun Gagasan Rakyat Bohogian Karambunai, id Lintuhun Reflesia Politeknik Kota Kinabalu, do hiti di tadau baino’.
Dr. Mohd. Arifin minoboros, id suang timpu oruhai diti i Boyoon Montiri papahabar po do inggisaman balajaran di wagu montok monguhup tanak Sabah lolobi no id siktor kaganaan balajaran id pogun diti.
“Koporintaan nga’ popointutun nogi’ inggisaman wagu ilo’ nopo nga’ Toluod Kaparagatan Sikul Miampai ‘One-Off’ (SUKSES) kumaa oinsanan sikul id pototongkop Sabah.
“Ponguhupan poobion kiginumu’ RM3,000 patahakon kumaa tikid sikul kituduan popoindalan mogisusuai kaparagatan om kopomolian susuai kogogonopan sikul,” ka di Dr. Mohd. Arifin pinopointalang.
Ka disio, SENTOSA nga’ toluod nogi’ kiginumu’ RM300 miampai one-off patahakon kumaa tikid mahasiswa balajar id kotinanan ngaawi’ pinsingilaan akawas (IPT) id suang Sabah.
“Iti nopo nga’ wookon inggisaman i pinoindalan koporintaan Gabungan Rakyat Sabah (GRS) id siriba’ Boyoon Montiri, Datuk Seri Hajiji Haji Noor i toririmo tumopot om opusou kumaa balajaran tangaanak tokou,” ka disio.
Daamot dilo’, id haal di poinggompit, Dr. Mohd. Arifin minoboros, Gagasan Rakyat Bohogian Karambunai otumbayaan do kouhup timpohon kalantaion id Pomilian Agayo Pogun (PRN) ko-17 diti.
“Otumbayaan tokou kopoguraan karaja’ pinokitonan di Luguan Bohogian dilo’, Datuk Arshad Irdis i asaru’ mindahu’ manalasai kobolingkahangan rayat id watas diti.
“Mantad dilo’, oinsanan puru kiguno sumosodia’ minggisom kumaraja’ papatantu’ calun GRS id DUN Karambunai kalantoi id PRN diti obontol,” ka disio.
