Ewon (kaapat, wanan) ontok minooi intong sinusulap padadagangan i nakapanau id Mini Karnival dilo’.
PENAMPANG: Soginumu’ RM7.5 riong pinatahak kumaa 1,809 mongindapu’ id Sabah maya’ Skim Koponguhupan Mongindapu’ Tomu (SPUT) pointonod pinointutunan di 2023.
Montiri Koburuon Mongindapu’ om Koperasi, Datuk Ewon Benedick, minoboros skim dilo’ momuntuk di mongingindapu’ ‘mikro’, kosuul no papadaadagang om mongindapu’ okoro’ i aparagat mongindapu’ id pasar om tomu pototongkop pogun.
“Iti kopokito tonggungan TEKUN Nasional id kapagarasan ikonomi rayat maya’ koponguhupan mikro, lolobi kumaa mogigiyon labus kakadayan i momoguno sokodung modal montok popoinggayo pongindopuan.
“Pointonod pinonuridongan dilo’ di 1998 gisom wulan Kaapat 2025, TEKUN Nasional nakapatahak RM10.31 bilion kumaa 598,969 mongingindapu’ id pototongkop pomogunon, kaamapi RM1.18 bilion kumaa 65,939 mongindapu’ id Sabah,” ka disio ontok pinopoimagon Mini Karnival TEKUN MADANI id Tomu Desa Inobong di tadau Minggu’.
Ka di Ewon, id Parlimen Penampang nopo, kiginumu’ RM36 riong pinatahak kumaa 1,730 mongindapu’ om montok timpu tulan Koiso’ gisom Kaapat toun diti, kiginumu’ 36 mongindapu’ nakaramit kouhupan RM634,000 id koiyonon diti.
“Id timpu di mibagal, kiginumu’ 1,663 pinambayar kiginumu’ RM29.9 riong pinolulus id pototongkop pogun.
“Ponguhupan diti okon nopo ko’ kouhup koburuon pongindopuan, nga nogi’ kopongukab kosiwatan pakarajaan kumaa mogigiyon nokoiyonon,” ka disio.
Minongomi kinalantaion kopointutunan om koburuon kopongindopuan, ka id Ewon limo siri Karnival TEKUN MADANI pinoindalan id pototongkop pomogunon po’ompus 2024, kaampai id Sabah, Selangor om Pulau Pinang.
“Karnival diti kosili impohon oponsol montok kopointutunan om kapadagangan mongingindapu’ nokoiyonon nogi’ kopokito waya’ sokodung TEKUN kumaa mongindapu’ mikro om PMKS.
“Koinsanai siri karnival nakalantoi minomuhu kapadagangan RM5.8 riong asil kinogompitan aparagat mongingindapu’ di kitonggungan om ‘inovatif’,” ka disio pinopointalang.
Ka disio, kinalantiaon dilo’ sinokodung po nogi’ piuhupan kosudong miampai TikTok Shop Malaysia i minongukab piromutan lobi kagayo id pidagangan digital.
Montok toun diti, Karnival TEKUN MADANI kumoiso’ pinaharo kopihondot Ramai Kaamatan 2025 id Kota Belud, miampai kinotonudan 142 mongindapu’ om nokoposurat kinapadagangan soginumu’ RM152,000 po’ompus tolu tadau poindalan.
