Dr. Joachim (rulud toguang, tanga) guminambar pongingitanan miampai Puru Kotinanan Bandaran Kudat sesi 2025-2027 nogi’ tombului apantang i noktoindapou id ramai dilo’.
KUDAT: Oinsanan Puru Kotinanan Bandaran Kudat (LBK) di wagu kosili pinosorou do poposili ‘prinsip’ kopoindalanan ponguludan di osonong sabaagi puralan kopio id kapapanahan karaja’ om tonggungan diolo’ kumaa rayat.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, prinsip kopoindalanan ponguludan osonong nopo nga’ posunduran kumaa nubasanan karaja’ abantug i nuru’ pasarabakon id koinsanai nayatan kopoindalanan karaja’ koporintaan koiyonon.
“Nubasan karaja’ di haro mositi’ no do mimpau kumaa prinsip kopoindalanan koponguludan di osonong, ilo’ nopo nga’ ‘akauntabiliti’ id kapapanahan karaja’ di pinatahakan, kinotulidon id kapatahakan nogi’ monompuan haal di kopohompit kootusan, om koulalaho’ kabaalon id kapatahakan surupukaraja’.
“Prinsip ngaawi’ diti no i kiguno kopio sumili tiigitan do oinsanan puru kotinanan,” ka disio ontok minoboros id Ramai Tuminaru om Kinapatahakan Watikah Koposilihan Puru-puru Kotinanan Bandaran Kudat montok sesi 2025 gisom 2027 id Grand Ballroom, Kelab Golf & Marina Resort Kudat, do hiti, di tadau baino’.
Dr. Joachim (kotolu, gibang) pinapatahak watikah koposilihan kuminaa Puru Kotinanan Bandaran Kudat sesi 2025-2027, Dato Shawn Davey Robert Lee.
Kiginumu’ 18 Puru Kotinanan minamaramit surat koposilihan id ababayan dilo’.
Dr. Joachim pinosotol, puru kotinanan kitonggungan sabaagi popiromut do koporintaan, kosuul no Bohogian Kikuasa’ Nokoiyonon (PBT), miampai mogigiyon, potilombus dino kitonggungan mogowit rolou rayat id kapamalanan katatapan nogi’ monginsonong naangayan kapatahakan surupukaraja’.
Ka disio, kinoposilihan puru kotinanan okon i ko’ sabaagi nopo iso’ kopongokunan, nga nogi’ iso’ tonggungan agayo i monugat tinonggungan, kinotulidon om kopulokison id koponguhupan LBK popoindalan karaja’ dau do poinpuli om monompuan kogugunoon mogigiyon nokoiyonon.
“Orohian oku nogi’ do poposorou mooi do tikid laang, katatapan om kootusan di onuon mositi’ no do mimpau prinsip kopoindalanan ponguludan di osonong montok manamong koponsolon rayat,” ka disio kawagu.
Pinapatahak nogi’ isio pamagatangan om panangkabayahan kumaa LBK mantad kinalantaion minamaramit Gaa’ Kecemerlangan Khas PBT Toun 2024 om Gaa’ Kecemerlangan Pegawai Eksekutik Toun 2024, Harun Ariffin id Ramai Gaa’ Surupukaraja’ Abantug Nayatan Komontirian di ko 9tw Kolimo katatalib.
Dr. Joachim (koduo, wanan) minamaramit tandamato mantad di Charles William om sinasi’ di Dr. Jamili (wanan) om i Harun.
Dr. Joachim minoboros, naangayan dilo’ kopokito tonggungan akawas LBK id kopoinggirotan kopoindalanan ponguludan nogi’ mongingkawas naangayan surupukaraja’ koporintaan id Kudat, potilombus dino kosili ombitanan kumaa PBT suai id pogun diti.
Kalansanand isio oinsanan puru kotinanan i sinili kaanu mogiuhup mogowit koinwoguon di ‘kreatif’om ‘inovatif’ id koponoguangan kaantaban koponguludan nokoiyonon noondo diti, kopiongoi di angkabon Sondikoton Sabah Maju Jaya om Malaysia Madani.
Nokotindapou nogi’ Monguhup Montiri Kousinan I po nogi’ Puru Lintuhun Undangan Pogun (ADUN) Matunggong, Datuk Julita Majungki; ADUN Banggi, Datuk Mohammad Mohamarin; Monunurat Atatap Komontirian Koporintaan Koiyonon om Pomuwalaian, Datuk Dr. Jamili Nais; Pesuruhjaya Kotinanan Bandaran Kudat, Charles William Dabbi; Monguhup Upisor Watas Okoro’ Banggi, Jaslee Jaafar; Monguhup Upisor Watas Okoro’ Matunggong, Tinah Maralin om Luguan Pulis Kudat, Supt. Haris Ibrahim.
