Dr. Joachim (tohuri, tanga’) om Jannie (koduo, gibang) suminasi’ kinapatahakan toluod bakul takanon Petronas i pinotunui di Siti Haniza kumaa songulun mantad mamaramit.
KOTA KINABALU: Kumoduo Boyoon Montiri Sabah II, Datuk Seri Dr. Joachim Gunsalam minamarayou laang do Jetama Sdn Bhd i minonsupu’ susuyan sabaagi komponi poinhompit koporintaan (GLC) kumoiso’ i minanakadai poinponu’ pamaramaian Kaamatan id nayatan raan KDCA om watas.
Minoboros isio, laang dilo’ kosili turianan osonong poingkuro siktor korporat kaanu papamanau tonggungan oponsol id kapagarasan koubasanan om monuridong mogigiyon osompuru.
“Orohian oku mongunsikou au’ gigina’ kumaa KDCA Kapayan om Jetama mantad kinalantaion pinapaanjur pamaramaian Kaamatan di kirati kopio do toun diti,” ka disio ontok pinopoimagon Ramai Pompupusan Kaamatan KDCA Kapayan Jetama 2025 id Lintuhun Kampung Kibouvang, Kepayan di tadau baino’.
Dr. Joachim pinopoindalan gimik kinopoimaganan Ramai Kaamatan KDCA Kapayan Jetama miampai minonuntung tagung om sinasi’ di Jannie nogi’ tombului di nokorikot.
Dr. Joachim po nogi’ Montiri Koporintaan Koiyonon om Pomuwalaian minoboros, sokodung agayo miagal dilo’ kopokito do GLC nga’ kaanu sumili mononokodung ponuridongan mogigiyon di ‘inklusif’ (kotonggoi ngaawi’) om oulud.
Minamarayou isio uhu Kaamatan toun diti, “Kaamatan Montok Oinsanan”, i komoyon disio kohunung kopio di koyuon mogigiyon orukut tinaru, ugama’ om koubasanan id Sabah.
“Karamaian kinoomotan diti okon ko’ karamaian mogigiyon Kadazandusun nopo, nga’ iso’ tungkusan koubasanan i koponompuru rayat maya’ sunduan kopongunsikohan, mitatabang om kopogiagalan,” ka di Kumoduo Presiden Koisaan Koubasanan Kadazan Dusun (KDCA) dilo’.
Ka disio, ramai miagal dilo’ kapanahak kosiwatan kumaa sukod wagu mintutun om mamagatang koubasanan sondiri’, kaampai maya’ sayau Sumazau, nogungan, posokodoton koubasanan om taakanon tungkusan.
Id timpu miagal, minoboros isio, kopongukab nogi ilo’ kosiwatan ikonomi kumaa tongo’ mongindapu nokoiyonon om popoburu’ seni om koubasanan.
Kohondot dilo’, unsubon disio lobi po kogumu’ komponi tumigulai momit laang do Jetama miampai okon nopo ko’ popoindalan tonggungan sosiol korporat (CSR), nga nogi’ momuruan kapagarasan koubasanan.
Dr. Joachim (tanga’) pinopowonsoi kopogkotuan parai miampai di Jannie (kotolu, gibang) om ilo’ suai.
“Manangkabayahan om mongunsikou oku kumaa Jetama om oinsanan puruankuasa’ manganganjur mantad tonggungan om karaja’ agaras diolo’,” ka disio.
Nokotindapou nogi’ id ramai dilo’ i Puru Lintuhun Undangan Pogun (ADUN) Kapayan, Jannie Lasimbang, i po nogi’ Ponorikohon Koperasi Koburuon Desa; Ponorikohon Manganganjur, Gundohing Ts. Jude Abel Logijin; Ponorikohon om Luguan Upisor Eksekutif Jetama Sdn. Bhd., Datuk Yusuf Abd Manan om Datuk Ahmad Naim Uddang; Monijor Agayo Petronas Sabah om Labuan, Siti Ayu Haniza Abdul Wahab; Luguan Watas Penampang, OKK Charles Masuli om Luguan Mamasok Pogun, Alice Dison.
Ababayan dilo’ rinamai miampai mogisusuai pokikitanan koubasanan, takanon koubasanan om kinogonudan mogigiyon nokoiyonon i kopokito sunduan Kaamatan sabaagi ramai rayat pototongkop Sabah.
