Hajiji miampai paganakan dau minomutul ‘kek’ kinouliton toun id ramai kinouliton toun Kinosusuon disio di ko-70.
TUARAN: Koyuon di osuau om oulud kopio opurimanan id Lintuhun Seri Sulaman di songkosodop kopihondot ramai kinouliton toun kinosusuon ko-70 di Boyoon Montiri (KM), Datuk Seri Haji Hajiji Haji Noor i pinaanjur miampai gonsuhatan, poinponu’ kopongunsikohan om pamagatangan.
Ramai dilo’ i notindapou di lansanon koporintaan pogun, tongo’ mongongobi’ rayat, luguan ngaawi’ koupisan om lansanon mogigiyon pinaharo montok minamaramai kinouliton toun kinosusuon lansanon koupusan rayat, i ogumu’ kinouhupan id kinopoburuan pogun.
Ponorikohon Puruankuasa’ Pongonjuran Pinamaramaian dilo’, Datuk Abdul Kassim Razali id boboroson disio minoboros, okon ko’ asasanang mokianu kasagaan mantad di Hajiji montok papaanjur ramai kinouliton toun kinosusuon di gonsuhatan diti, tu’ nosili koubasanan disio mamaramai tadau poinbida’ dilo’ miampai paganakan om koombolutan osomok.
Ka disio, ababayan kapamaramaian diti tanda’ pongunsikohan om kopongokunan di kopomuruanan di Hajiji i potilombus pointootopot mogowit kosimbanon osonong montok koburuon pogun om kasasanangan rayat.
Ababayan dilo’ rinamai miampai pokikitanan sinasawat karait susuyan koposion di Hajiji, sayau koubasanan, sinding om moginakan i nokoponinong sunduan piuludan paganakan om kopogiagalan id nayatan lansanon om rayat.
