Dr. Joachim pinopoindalan gimik kopoimaganan miampai minonuntung tagung Ramai Kaamatan Nayatan Watas Tongod 2025 om sinasi’ dio’ Masiung (gibang) dii Yuesri (koduo, wanan).
TONGOD: Mogigiyon mogisuai ‘etnik’ (tinaru) id Sabah unsubon do lobi kaparagat popointutun om momogompi’ koubasanan nogi’ kointutunan tungkusan sompoopori ponoko’inggisaman monginggirot piuludan om pisompuruan pogun.
Kumoduo Boyoon Montiri II, Datuk Seri Dr. Joachim Gunsalam minoboros, inggisaman dilo’ oponsol mooi do tungkusan koubasanan amu’ atalup di kinoiwoguan pomogunan.
“Tikid tinimungan tinaru om sub-etnik id pogun diti mositi’ oondos di kointutunan koubasanan i notungkusan mantad komolohingan om popoinparagat inggisaman do popokito kinolumison sompoopori.
“Nuru’ tokou momusus kinolumison koubasanan tokou sabaagi tulun Kadazan Dusun Murut om Rungus (KDMR) om nuru’ kopurimanan oondos tu’ pasanganu tokou do koubasnaan di ongolumis id kinoiyonon tokou sondiri…. om ilo’ i nuru’ tokou do gompion id sunduk posokoton om tuunion noig’ koubasanan kinoubasanan,” ka disio ontok pinopoimagon Ramai Kaamatan Nayatan Watas Tongod 2025 id Lintuhun Kampung Entilibon di tadau Ko’onom (10tw Kolimo).
Dr. Joachim, Masiung (tohuri) om Yuesri (wanan) minokinongou kopointalangan mantad songulun mongindapu’ ontok pinapaharo kinotombuluyan id sinusulap pososorili’ Lintuhun Kg. Entilibon.
Dr. Joachim i po nogi’ Montiri Koporintaan Koiyonon om Pomuwalain minoboros, piromutan oulud pogialatan tinaru nopo nga’ kunci montok monoguang mogisusuai kaantaban i kopomigangau kaadangon pogun.
Ka disio, piuhupan om pogipapantangan sompipi’ mogigiyon mogisusuai nantadon nopo nga’ posunduran kumaa kaadangon, kotoronongon om komogoton pogun Sabah.
Ka disio, karamiaan miagal Kaamatan nosili kosiwatan koponompuruanan mogigiyon orukut tinaru nogi’ kokitanan pinuawang koubasanan om sunduan kopogiagalan rayat Sabah.
Dr. Joachim minongunsikou kumaa di Puru Lintuhun Undangan Pogun (ADUN) Kuamut, Datuk Masiung Banah om puruankuasa’ manganganjur i binuruan di Upisor Watas Tongod, Yuesri Ismail Yusof om oinsanan i nokotindapou nogi’ minonuhu rayat tumilombus momogompi’ sunduan pisompuruan om kopogiagalan.
Dr. Joachim monongkirumo om tuminabi’ dilo tulun ginumuan i nokotindapou id ramai dilo’.
Dr. Joachim nga’ minamarayou kopongonjuran Ramai Kaamatan nayatan watas dilo’ i ka disio okon nopo ko’ koposindak tungkusan koubasanan nga nogi’ kouhup kumaa koburuon ikonomi nokoiyonon.
Ka disio, bohogian koporintaan momoduli’ kopio do koburuon id oinsanan watas kaampai watas Tongod.
Pinokianu disio oinsanan i nokotindapou id ramai dilo’ do momili’ koporintaan poinharo mantad montok momorinta’ pogun Sabah.
“Onuan no do kosiwatan koporintaan i haro noondo diti. Miampai poinpuli, id timpu limo otun miampai koporintaan Gabungan Rakyat Sabah (GRS) nakaanu minongingkawas asil pogun, somok 7 bilion di toun 2023 om 2024. Asil diti pinatahak kumaa rayat maya’ tongo’ ponguhupan i mogisusuai om nakapanahak koundaran kumaa oinsanan nayatan mogigiyon,” ka disio.
Dr. Joachim om Masiung pinopoindalan ababayan ‘mongomot’ parai. Ramai Kamaatan nayatan watas Tongod dilo’ pinaanjur solinaid 3 tadau minimpuun di ko 7tw Kolimo.
Kapamaramaian Ramai kinopoimaganan dilo’ rinamai po nogi’ di mogisusuai pokikitanan koubasanan, pokikitanan tinunturu nogi’ pinialaan Undung Ngadau nayatan watas.
Pinokianu disio oinsanan mogigiyon do tumilombus poposindak kapamaramaian Kaamatan id oinsanan nayatan kaampai kampung, sikul om kotinanan.
“Uhu toun diti ‘Kaamatan Montok Oinsanan’ kopiongoi kopio di koyuon kopogisusuaian mogigiyon id Sabah i poinpasi otoronong om oulud,” ka disio.
Naamot dilo’, i Yuesri minongunsikou kumaa di Dr. Joachim i nakasaga’ tuminindapou pinopoimagon ababayan.
I Yuesri doid boboroson disio minonongkounsikou di Dr. Joachim maya’ Koporintaan Koiyonon om Pomuwalaian, i pinopoobi’ kousinan montok minonginsonong lintuhun Entilibon i babaino’ diti id koyuon di lobi kosonong om koposimbayan nung piagalon di pogulu diti.
“Mongunsikou oku kopio kouhupan mantad koporintaan maya’ KKTP i nosili monokodung kopio kinalantaion karamaian diti.”
Id ababayan sopisuai, Dr. Joachim tinanud di Monunurat Pulitik Kumoduo Boyoon Montiri II i po nogi’ ADUN Telupid, Datuk Jonneybone Kurum do pinopoimagon Ramai Kaamatan nayatan Mukim Pekan, i pinaanjur id Kg. Bauto, Telupid.
