Hajiji (poindikau, tanga’) om tombului pinotomod guminambar miampai tongo’ Puru Kounsol Watas Tuaran sesi 2025-2027 katalib Ababayan Tuminaru om Kinapatahakan Watikah Koposilihan AMD Tuaran Toun 2025-2027 id Shangri-La Rasa Ria Resort, Tuaran, di tadau baino’.
TUARAN: Boyoon Montiri, Datuk Seri Haji Hajiji Haji Noor pinoposotol do koponsolon tonggungan aparagat om kitinonggungan puru kounsol watas id koponokodungan kopoindalanan kinatatapan koburuon pogun.
Pinosotol disio do puru kounsol watas okon nopo ko’ kopooput rolou rayat, nga nogi’ nuru’ sumili ejen kopoindalanan di kiwaya’ kumaa inggisaman koporintaan, kosuul no Palan Koburuon Sondikoton Sabah Maju Jaya (SMJ).
“Puru kounsol watas kiguno lobi koporokis id kapatahakan surupukaraja’ kumaa rayat. Ogonop do toilaan om karait di kogunaan, karaja’ om tonggungan diolo’.
“Oponsol iti montok papasanang kopoindalanan katatapan koporintaan om papatahak ponguhupan nogi’ ababayan koburuon kumaa rayat miampai opulokis om otulid,” ka disio id Ramai Tuminaru om Kinapatahakan Watikah Kinoposilihan Puruan Ngaawi’ Kounsol Watas Tuaran sesi 2025-2027 id Shangri-La Rasa Ria Resort do hiti, di tadau baino.
Boyoon Montiri minoboros, kalantaion kopoindalanan Palan Koburuon SMJ tumanud kumaa tonggungan oinsanan bohogian kaampai Bohogian Kikuasa’ Nokoiyonon (PBT) om puru kounsol watas. Puru kounsol watas kiguno miuhup miampai koporintaan pogun id kapatayadan kointalangan katatapan, inggisaman nogi’ ponguhupan koporintaan gisom id nayatan siriba’.
Hajiji nga’ pinopoulud nogi’ pipiro inggisaman koburuon i masaan om maan poindalano’ id watas Tuaran, kaampai monginsonong rontob kogogonopan miagal talun-alun, pangaba’ waig om lotirik, koburuon ponombuluyan om nogi’ kopoinggirotan kopongindopuan nokoiyonon.
“Poingkuro po ginayo kopoobian koburuon, amu ilo’ kapanahak rati nung aiso’ kapatahakan di opulokis. Puru kounsol watas kiguno mindahu’, mintong sondiri’ tongo’ kobolingkahangan rayat om maganu laang miampai poinponu’ tinonggungan, otulid ginawo om pointalang,” ka disio.
Isio po nogi’ ADUN Sulaman, minokianu nogi’ di koinsanai puru kounsol watas do papamanau tonggungan sabaagi jambatan id pialatan rayat om koporintaan, mogowit rolou rayat kumaa nayatan pomorintaan om papatantu’ tikid katatapan nogi’ ababayan koporintaan orotian om aramit do mogigiyon.
Ka disio, kinoposilihan Puru Kounsol Watas Tuaran diti baino’ kapaampai mantad mogisuai nantadon kaampai bagas pakakaraja koporintaan, puru pongindopuan, tokoh komulakan om nogi’ mongongobi’ tinan okon koporintaan (NGO), minongobi’ rolou apat watas Lintuhun Undangan Pogun ilo’ nopo Sulaman, Pantai Dalit, Tamparuli om Kiulu.
Ka disio, kopogisusuaian diti kotumbayaan sabaagi ginoris id kapamalanan katatapan om monoibau koguugunoon rayat do poinpuli.
“Otumbayaan oku maya’ angkab di akawas om sunduan karaja’ tinimungan, puru kounsol watas kaanu popoindalan tonggungan diti montok komogoton om kasasanangan rayat Tuaran,” ka disio.
Nokotindapou nogi’ id ababayan dilo’ Montiri Koburuon Labus Kakadayan Pogun po nogi’ ADUN Tamparuli, Datuk Jahid Jahim; Monguhup montiri Koporintaan Koiyonon om Pomuwalaian Pogun, Datuk Isnin Aliasnih; Monguhup Montiri Ponombuluyan, Koubasanan om Sandad Posorili’ po nogi’ ADUN Kiulu, Datuk Joniston Bangkuai; Puru Parlimen Tuaran, Datuk Seri Wilfred Madius Tangau om ADUN Pantai Dalit, Datuk Jasnih Daya.
