Dr. Joachim (poindikau, tanga) guminambar pongingitanan miampai tombului naalap om koinsanai mamaramit ponguhupan UNTUKMU id Sinasawat Koubasanan, Kundasang, di tadau baino’.
KUNDASANG: 643 mongindapu’ sinusulap okoro’ tisan ralan id pototongkop Sabah di noilaan kosudong mamaramit Ponguhupan ‘One-Off’ (insan-insan) kiginumu’ RM5,000 miagal pinahabar id kinapawaladan Bajet Pogun Sabah 2025.
Kumoduo Boyoon Montiri II, Datuk Seri Dr. Joachim Gunsalam i pinapahabar diti minoboros, nuludan ngaran mamaramit ponguhupan dilo’ nokoimagon soira’ nokoindalan ‘verifikasi’ (kinopongilaan) poinpuli winonsoi di iso’ puruankuasa’ pinotomod kopohompit Komontirian Koporintaan Koiyonon om Pomuwalaian (KKTP), Komontirian Kousinan Pogun nogi’ Bohogian Kikuasa’ Nokoiyonon (PBT).
“Ababayan mindahu diti pinoindalan montok maganu kointalangan mongingindapu’ sinusulap okoro’ tisan ralan id koinsanai watas. Soira’ nowonsoi ponorisidan tumanud karalano’ di nakatantu’, soginumu’ 643 mongindapu’ i noilaan kosudong mamaramit ponguhupan diti,” ka disio ontok pinopoimagon Ramai Kick-Off Kapatahakan Ponguhupan Inggisaman Monginsonong Rontob Montok Tinimungan om Mogigiyon Ginumuan (UNTUKMU) nayatan pogun Sabah id Sinasawat Koubasanan Kundasang, do hiti di tadau baino’.
Dr. Joachim (tanga’) guminambar miampai Mongindapu’ Okoro’ Tisan Ralan i ruminamit ponguhupan UNTUKMU montok watas Ranau.
Dr. Joachim po nogi’ Montiri Koporintaan Koiyonon om Pomuwalaian minoboros, mantad ginumu’ dilo’, 47 mamaramit mantad watas Ranau nakaramit ponguhupan dilo’ id upa’ ponguhupan tusin tunui ‘one-off’ kiginumu’ RM5,000 tikid songulun.
Ka disio, inggisaman dilo’ wookon tanda’ kopusohon koporintaan pogun kumaa konosipan mongingindapu’ okoro’ i kotoguang kaantaban miagal kos kopoindalanan minsawat, kinokurion modal om kinoiyonon pongindopuan i amu’ pointatap.
Dr. Joachim ontok minanahak boboroson id ababayan dilo’.
Komoyon nogi’ disio mongingindapu’ okoro’ sabaagi popogura’ ikonomi ‘mikro’ i kitonggungan oponsol id koposodiaan surupukaraja’ kumaa mogigiyon nokoiyonon.
“Kalansanan ponguhupan diti aanu gunoon poinsonong, i potuu montok pomoli kakamot, sabaagi modal pomoruhang, toi popoinggayo po do pongindopuan di poinharo mantad,” ka disio.
Ramai di tadau nokopokito po nogi’ kinapatahakan ‘mock check’ kumaa PBT di poinhompit pogulu kinopoikidan ponguhupan dilo’ kumaa watas ngaawi’ suai poindalanon do montoroiso’.
Nokotindapou nogi’ Kumoduo Monunurat Pointatap II KKTP, Faridah Giau; Upisor Watas Ranau, Tinus Manggam; Presiden Kounsol Kakadayan Penampang, Francis Chong; mobi’ kumaa Puru Parlimen Ranau, Hussen Haji Jerat; mobi’ kumaa ADUN Karanaan, Datuk Faimin Kamin; mobi’ kumaa ADUN Paginatan, Hishamuddin Harun; Kumoduo Luguan Pulis Watas Ranau, ASP EDianshah Endal; Upisor Eksekutif Watas Ranau, Elmer Endra M. Sator; upisor ngaawi’ KKTP om tongo’ lansanon mogigiyon.
