Haji Hajiji Haji Noor
KUDAT: Kudat haro kosiwatan agayo montok tumilombus koburu’, kosuul no id siktor Ekonomi Biru (Ikonomi Obulou), nosusuhut kinoiyonon dilo’ i kosudong om poingoros do pomogunan miagal China, Korea Selatan om Jipun.
Boyoon Montiri, Datuk Seri Haji Hajiji Haji Noor minoboros, Ikonomi Obulou i pinoimpuun di toun nakatalib pikikiro kosili posunduran wagu id inggisaman monginggumu’ ponit ikonomi pogun.
“Kudat, miampai kogogonopan di poinharo kaampai rahat aralom om dodopiton, kosudong kopio montok koburuon diti. Ingkaa nogi’ i atag Taman Pomorunan Kudat i moningkanan do pomorunan kopohompit takanon rahat om kogogonopan pidagangan, i pikikiro kounsub koburuon ikonomi nogi’ mongimbulai kosiwatan pakarajaan,” ka disio.
“Surupukaraja’ feri wagu kumaa Palawan nga’ pikikiro kapasarok pidagangan, ponombuluyan om pongindopuan okoro’ om gonsuhatan (PKS) nokoiyonon, potilombus dilo’ popogisusuai ponit ikonomi,” ka disio ontok pinopoimagon Galeri Sejarah Hakka om Mercu Tanda (Kointutunan) Kapal-Gereja, Lausan do hiti, di tadau baino’. Boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Abidin pinopoindalan gimik kinopohimaganan Galeri Sejarah Hakka om Tanda’ Kointutunan Kapal-Gereja id Lausan, Kudat.
Hajiji minamarayou nogi’ Gereja Kristian Basel Malaysia (BCCM) mantad kinalantaion minomongo Tanda Kointutunan Kapal-Gereja om Galeri Sejarah Hakka i kopotigulai tungkusan koubasanan mogigiyon Hakka id Sabah, hinombo do komolohingan diolo’ nokorikot id Kudat di toun 1883, lobi hatus toun nakatalib.
“Otopot nopo, goduduo tanda kointutunan diti okon nopo ko’ naangayan seni bina om koubasanan, nga nosili ponokotanda’ tungkusan, sunduan mogigiyon om pisompuruan.
“Mongunsikou yahai inggisaman poposili kinoiyonon diti sabaagi kompleks mogigiyon i momogompi’ tataba’ tungkusan, i kikogunaan monuduk sukod dumontol di nantadon om kointutunan diolo’,” ka disio.
Ka disio kawagu, koburuon koiyonon dilo’ sabaagi rikoton ponombuluyan kosuayan nopo nga’ laang di popusorou osodu’.
“Pongimbayat koubasanan om susuyan kahandaman tantu’ no do koimbayat tutumombului mantad suang om labus pogun. Korikotan tutumombului diti okon nopo ko’ kopongingkawas ‘profil’ Kudat, nga nogi’ kapanahak waya’ ikonomi kumaa mogigiyon nokoiyonon – kopongimbulai pakarajaan, mongunsub kopongindopuan, om mongingkawas rontob koposion,” ka disio.
Hajiji minanahak jominan do koporintaan pogun tumilombus manahak sokodung poinponu’ kumaa inggisaman miagal dilo’.
“Koporintaan pogun pointotopot om toririmo momoguno kinaadason nogi’ kaadangan id koponguhupan mogigiyon amu’ momuntuk tinaru om ugama’.”
Ka disio, do toun diti koporintaan pogun pinopoobi’ RM70 riong kumaa tongo’ tinan kougamaan okon Islam, sikul mission om sikul mimpoopori montok monumboyo’ kogugunoon diolo’.
“Ginumu’ diti nokoingkawas soginumu’ RM13.25 riong nung piadangon pinoobi’ toun 2024 ilo’ nopo RM56.75 riong. Tumilombus tokou monguhup montok papatantu’ pisompuruan, piuludan tinaru om pogihunungan ugama’ di ogirot kotilombus poinggompi’,” ka disio.
