Hajiji (tanga’) napit dio’ Shahelmey (gibang) dii James (wanan) pogulu nokotimpuun kopointalangan.
KOTA KINABALU: Boyoon Montiri, Datuk Seri Haji Hajiji Haji Noor minoboros, projik kopoburuan Pisompuruan montok sikul om kolinik aanu poindalanon miampai amu’ nuru’ mindad geran tana’ gigisom po do nokoimagon ilo’ montok tuduan di komoyon.
“Koporintaan pogun pinapatantu’ do aiso’ kogunoon montok mongindad garan tana’ gigisom po do tana’ dilo’ pinoimagon montok tuduan projik koburuon pisompuruan.
“Nung tana’ di gunoon montok monuridong sikul toi kolinik, mositi’ tokou popoinsanang dilo’ moo do aiso’ koinloidan id kopoindalan tongo’ projik diti,” ka disio ontok kinotombuluyan karaja’ kuminaa Komontirian Koburuon Mogigiyon om Kasasanangan Mogigiyon id Wisma Tun Fuad do hiti, di tadau baino’.
Boyoon Montiri nga’ minongunsub komontirian montok momoromut di agensi pisompuruan poinhompit id Sabah montok monginggirot pisokodungan miampai diolo’.
“Nung haro kohompitan om piuhupan, kaanu tokou popoindalan projik kopoburuan miampai oturundus,” ka disio minongomi di haal ngaawi’ i pinolombus di Montiri Koburuon Mogigiyon om Kasasanangan Mogigiyon, Datuk James Ratib.
Hajiji minamarayou nogi’ komontirian mantad palan dau do mongingkawas kasasanangan om kolidasan mogigiyon maya’ pinonuridongan Longkod Autisme Sabah id Sembulan nogi’ kinoonuan misin ‘Positron Emission Tomography’ (PET Scan) om ‘Single-Photon Emission Computed Tomography (SPECT Scan) kigatang riniongan ringgit o wookon.
Misin PET om SPECT montok pongilo bato poinsodia’ id Walai Pongubatan Tondu om Tangaanak Likas.
Nokopogulu, Monunurat Pointatap Komontirian Koburuon Mogigiyon om Kasasanangan Mogigiyon, Datuk Maria Chong, minanahak kopointalangan kumaa di Boyoon Montiri om tinonudan karait ababayan om palan komontirian do obontol.
“Okito ku Komontirian Koburuon Mogigiyon om Kasasanangan Mogigiyon sabaagi komponen oponsol id sistem koporintaan, lolobi no kasasanangan mogigiyon nopo iso’ mantad tingkananon id Sondikoton Sabah Maju Jaya,” ka di Hajiji.
Nokotindapou nogi’ Kumoduo Boyoon Montiri III po nogi’ Montiri Karaja Agayo, Datuk Ir. Shahelmey Yahya; Montiri Kousinan, Datuk Seri Masidi Manjun; Montiri Koburuon Labus Kakadayan, Datuk Jahid Jahim; Montiri Ponombuluyan, Sandad Posorili om Koubasanan, Datuk Seri Christina Liew om Monunurat Koporintaan Pogun, Datuk Seri Sr. Safar Untong.
