Hajiji (kotolu, wanan) miampai Montiri Suang Pogun, Datuk Seri Saifuddin Nasution Ismail (koduo, wanan) om Montiri Intodonon Tulun, Steven Sim Chee Keong (koduo, gibang) nogi’ tombului di suai pinopokito buuk Puralan Monoibau Buruh Paksa om Buruh Tanak-Anak Nayatan Pogun Sabah katalib pinopoimpuun dilo’ id Konvensyen Manangod Kopomusalaan Pamadagangan Tulun om Buruh Paksa 2024.
KOTA KINABALU: Koporintaan Pogun lumansan ponimbanan Rang Undang-Undang (RUU) Akta Ordinan Buruh Sabah i pinatantu’ ontok Pitimungan Parlimen Penggal Kaapat do wulan Kohopod 2024, karamit sokodung ouli’ mantad koinsanai Puru Parlimen.
Boyoon Montiri, Datuk Seri Haji Hajiji Haji Noor minoboros, RUU Akta Ordinan Buruh Sabah (Ponimbanan) 2024 pinawalad montok bacaan kumoinsan di Montiri Intodonon Tulun ontok sesi Parlimen Kumoiso’ Penggal Kotolu di 17tw Koturu’ 2024.
“Agayo kalansanan ku bacaan kumoinduo ponimbanan RUU diti i pinatantu’ id sesi pitimungan Parlimen Penggal Kaapat do wulan Kohopod 2024 karamit sokodung ouli’ mantad oinsanan Puru Parlimen.
“Otumbayaan oku kopio do ponimbanan Ordinan Buru (Sabah Bab 67) diti kapanahak koundaran kumaa touki om pakakaraja’ id pogun Sabah miampai puralan di lobi osorisid om oulud monotk oinsnaan bohogian id kopongingkawasan piromutan pomorunan di lobi koulud om osimbayanan,” ka disio ontok pinopoimagon Konvensyen Manangod Kopomusalaan Pamadagangan Tulun om Buruh Paksa Toun 2024 id Longkod Konvensyen Sompomogunan Sabah (SICC) do hiti, id tadau baino’.
Hajiji pinopowonsoi gimik kinopoimaganan Konvensyen Manangod Kopomusalaan Pamadagangan Tulun om Buruh Paksa 2024.
Hajiji minoboros, koporintaan pogun minanahak kookunan om sokodung poinponu’ kumaa ponimbanan RUU dilo’ tu’ iso’ mantad 16 perkara ponimbanan dilo’ nopo nga’ kopohompit do haal ‘human rights’ om ‘labour rights’ nogi’ kopongiduan ‘diskriminasi’ (ponompinian) i kapatatap kasalaan om ukuman kumaa touki toi nombo-nombo bohogian i popoindalan pamadagangan tulun, ‘buruh paksa’ om buruh tanak-anak.
Ka disio, iti kopiongoi di tonggungan koporintaan ‘meratifikasi’ (kinopongokunan) Protokol 29 Kotinanan Buruh Sompomogunan (ILO) sabaagi kointalangan tonggungan koporintaan mongidu’ buruh paksa id pomogunon diti.
Minoboros isio, kopomusalaan pamadagangan tulun om buruh paksa kiguno soibahan miampai pointunud tumanud katatapan om koundangan di poinharo mantad mooi do aanu ilo’ do manalob om monoibau mooi amu’ kosili kobolingkahangan id nayatan pogun om sompomogunan.
Ka disio, koporintaan pogun moningkanan om tumopot id kasahapan kopomusalaan pamadagangan tulun om pomogunaan buruh paksa id pogun diti, i momoguno sokodung ogirot om piuhupan pialatan kotinanan koporintaan pogun om Pisompuruan, tinan okon koporintaan om bohogian kikuasa’ nokoiyonon.
“Kinoiyonon pogun diti i miilang piwolitan miampai pipiro pomogunon kaampai Indonesia om Filipina gisom pamanahan padarapas piwolitan lobi kasanang, i potilombus dino koposili Sabah poinbanta’ kumaa koulalaho’ kapamanahan padarapas piwolitan, pamadagangan tulun om buruh paksa,” ka disio.
Hajiji minoboros, koporintaan pogun pinopoimagon om minangakun tonggungan oponsol Kounsol Antipemerdagangan Tulun om Antipenyeludupan Migran (MAPO) i buruanon do Komontirian Suang Pogun (KDN) om tongo’ kotinanan i sinili id koponoibahan pomusalaan pamadagangan tulun om buruh paksa id Malaysia.
Id haal dilo’ ka disio, pisokodungan pialatan koporintaan pogun om tongo’ kotinanan Pisompuruan kosuul no i poinhompit mitilombus id siriba’ dolundung MAPO kiguno pagarason montok papatantu’ sunduk kopogiratankuasa’an, pongumoligan om kapantalaban pomusalaan pamadagangan tulun om buruh paksa aanu popoindalan miampai poinsonong mooi do Malaysia amu’ tondoson popoindisan toi amu’ momoduli’ haal dilo’.
Ka disio, pakakaraja’ nopo nga’ posunduran agayo om tambalut ‘strategik’ kumaa koburuon ikonomi sosonginan pomogunon tu’ pakakaraja’ di kitoilaan, kikomilaan akawas om kiharo ginirot tinan nopo nga’ impohonon i bobos oponsol kumaa pomogunon montok tumilombus koponikotopong om mongingkawas nimbulayan mooi do ikonomi pomogunon toririmo poinggirot om kiginaras rumompok id nayatan ‘glokal’.
Mokianu i Hajiji oinsanan touki toririmo papatantu’ nubasanan osonong pomorunan poindalanon, mongingakawas ‘piawaian perburuhan’ miagal poinsuang id katatapan om koundangan pomogunon, montok papatantu’ angkab om imanon koporintaan montok kokito pomogunon diti koidu’ mantad pamadagangan tulun om pomogunaan buruh paksa kosili katapatan om aanu monigampot.
“Iti oponsol id koponguhupan inggisaman koporintaan pogun popoindalan mogisusuai ababayan koburuon maya’ Sondikoton Sabah Maju Jaya, i okon nopo ko’ momoguno pakakaraja’ di kiginoris rumompok nga mananud koundangan pomogunon,” ka disio.
Kalansanan nogi’ disio kikiro 178,000 touki id pogun diti tumonggoi maganu bohogian sumain ‘ikrar’ om ‘akujanji’ id kasangadan pomusalaan pamadagangan tulun om buruh paksa.
Ka disio, touki sabaagi tulun oponsol kiguno mintong haal diti do poinwagat, monokodung om papatantom angkab montok monoibau kopomusalaan i kopomidsala’ koumoligan mogigiyon id pogun diti.
