KOTA KINABALU: Suruhanjaya Pongilagan Susuap Malaysia (SPRM) Sabah di tadau baino’ minanahan riman duo upisor kotinanan pogirotkuasa’ tu’ kotumbayaan nokohompit id kinopolombusan pas kotombuluyan IMM13 id watas diti.
Ponuhuan riman solinaid onom tadau gisom ko 6tw Kowalu’ 2024 pinalabus di Majistret Nur Faezah Jafry kumaa notondosan kumoiso’ i kiumur 50-an soira’ upalai winonsoi do SPRM id Kuut Majistret Sandakan di kosuabon baino’ naamot Majistret Don Stiwin Malanjum pinapalabus ponuhuan riman solinaid turu’ tadau gisom ko 7tw Kowalu’ 2024 kumaa notondosan kumoduo i kiumur 30-an soira’ upalai winonsoi SPRM id Kuut Sesyen Tawau.
Tumanud kointalangan, nokopogulu goduduo notondosan kusai tinahan kikiro jaam ko 5.30 sodopon gisom ko 7 totuong konihab ontok tuminingan minanahak kointalangan id Upis SPRM Sandakan om Tawau.
“Pinomogokoman kaawagu diti nopo nga’ nosusuhut di kinopomogokoman duo mianak kopohompit kes di miagal di tadau Kolimo katatalib.
“Ponoriukan osopung nokoilo goduduo notondosan i riniman di tadau baino’ diti kotumbayaan pinopowonsoi koulalaho’ dilo’ pointonod toun 2022 om nokopohompit gatang susuap kikiro RM20,000.
“Goduduo notondosan nga’ kotumbayaan nogi’ pinopowonsoi koulalaho’ dilo’ miampai ‘tulun tanga’ id koponompuanan potilombus kopongupalaian pas kotombuluyan IMM13 kumaa mogigidu’ Filipina i ruminikot om tumungolig id Sabah gama-gama’ kokusutan di kikiro kolimpuunon otun 1970-an,” ka disio.
Daamot dilo’, Potunud SPRM Sabah, Datuk s. Karunanithy soira’ rinomut pinopoimagon pinomogokoman dilo’ om minoboros, kes soriukon id siriba’ Seksyen 17(a) Akta SPRM 2009 om kinalantaion diti nopo nga’ mantad no pinonoludukan SPPM Sabah.
