Hajiji minananud di Tun Juhar minooi intong pokikitanan kopihondot kapamaramaian Tadau Kobilangan Nayatan Pogun Sabah Toun 2024 id Longkod Upis Pulis Kontinjen Sabah, Kepayan, di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor tuminindapou do ababayan kapangaramaian ‘Hari Pahlawan’ (Tadau Kobilangan) Nayatan Pogun Sabah 2024 id Dataran Kawad, Longkod Upis Pulis Kontinjen Sabah doid Kepayan, do hiti, di tadau baino’.
Kinorikotan disio di kikiro jaam ko 7.48 kosuabon talib dilo’ minamaramit tabik pamantangan mantad Tinimungan Kapanamangan Kapantangan Pulis Diraja Malaysia (PDRM) Kontinjen Sabah tinanudd i Mayor Bandaraya Kota Kinabalu, Datuk Seri Dr. Sabin Samitah om Pesuruhjaya Pulis Sabah, Datuk Jauteh Dikun.
I Molohingon Pogun, Tun (Dr) Haji Juhar Datuk Haji Mahiruddin i nokorikot di jaam ko 8 kosuabon talib dilo’ minaramaramit nogi’ do Tabik Pamantangan Diraja mantad Kapanamangan Kapamantangan PDRM (Pecah Bendera) om minomorisa’ kapanamangan kapantangan.
Kinapamaramaian dilo’ sinuangan do ababayan pinopokili Jalur Gemilang, Bondira Sabah nogi’ loyou Negaraku om Sabah Tanah Airku, Pinongobusan Tuntung Koompokon ‘The Last Post’ do PDRM, pokikitanan pinotomod do Tinimungan Susumangod Malaysia, bacaan sisindiron kobilangan, pinongobusan ‘Rouse’, pokikitanan om kinapatahakan toluod kumaa balu om paganakan puru koumoligan i nokorundun di maso Kinaantakan Tanduo Lahad Datu.
I Juhar miampai di Hajiji om nangaalap suai suminiwat nogi’ minooi intong Pokikitanan Kapamaramaian Tadau Kobilangan Nayatan Pogun.
Nokotindapou nogi’ i tongo’ Kumoduo Boyoon Montiri, Datuk Seri Dr. Joachim Gunsalam om Datuk Ir. Shahelmey Yahya; Speaker Lintuhun Undangan Pogun (DUN), Datuk Seri Kadzim M Yahya; Montiri Sains, Tiknologi om Inovasi, Datuk Dr. Mohd. Arifin Mohd. Arif; Montiri Koburuon Mogiigiyon om Kasasangan Mogigiyon, Datuk James Ratib; Monunurat Koporintaan Pogun, Datuk Seri Sr. Safar Untong Untong, tongo’ Kumoduo Speaker DUN om tongo’ Monguhup Montiri.
