KOTA KINABALU: Suruhanjaya Pongilagan Ponuapan Malaysia (SPRM) Sabah nakalantoi minonoibau sindikit ponumpodolian ponginwoguan paspot id Ops Fly di kaawagu diti.
Pinonoludukan i pinoindalan solinaid sombulan nokopongintalang sindikit paspot terbang mantad kinapanahanan tolu puru pogirotkuasa’ songinan koupisan tu’ kotumbayaan minamaramit susuap kikiro RM300,000 mantad sindikit dilo’ i kotumbayaan pointonod di toun 2023.
Tumanud kointalangan, koinsanai notondosan kusai kiumur tutukan 40an gisom 50an dilo’ kotumbayaan tinahan kikiro jaam ko 2 sodopon baino’ ontok tuminingan minanahak kopointalangan doid Upis SPRM Sabah.
“Koinsanai notondosan di tinahan kotumbayaan pinopowonsoi kaparagatan dilo’ pointonod toun 2023 gisom noondo om minamaramit tusin susuap kikiro RM2,000 tikid songulun montok songulun mongungupalai.
“Ponoriukan osopung nokoilo soginumu’ 100 mongungupalai di nakapaampai om ‘modus operandi’ nopo nga’ monimpudali’ sain mamaramit nogi’ momoguno poinsala’ sistem saap tunturu’ mongungupalai hinombo do kooturan papatantu’ mongungupalai nuru’ tumingan doid kotinanan montok maganu paspot di nokolulus.
“Puru pogirotkuasa’ i nokohompit talib dilo’ papatahak paspot kumaa tulun tanga’ miampai aiso’ kinorikotan di mongungupalai i kakal id sompogunan,” ka disio.
Ka wagu tadon kointalangan, asil pinonoriukan nokopokito pogirotkuasa’ poinhompit minamaramit tusin susuap mantad ejen maya’ kopoundolihan tusin kumaa akaun bank di songulun pogirotkuasa’ om talib dilo’ popoikid kumaa tambalut suai.
Daamot dilo’, Potunud SPRM Sabah, Datuk S. Karunanithy soira’ rinomut pinopoimagon kinopomogombitan dilo’ om minoboros, kes soriukon id siriba’ Seksyen 17(a) Akta SPRM 2009.
Ka disio, koinsanai notondosan owiton kumaa Kuut Kota Kinabalu, Sabah do suab, montok maganu upalai riman om amu’ magada’ kopikikiraan pipiro pomogokoman posusuhut kopohompit kes diti maan wonsoiyo’.
