Haji Hajiji Haji Noor
KOTA KINABALU: Koporintaan Pogun pinopoobi’ RM16.89 riong montok popoindalan mogisusuai kaparagatan komulakan kopohompit koburuon kopomuruanan om komilaan do papagaras komulakan kopiongoi di ‘Dasar Belia Sabah’ (Poimpahan Komulakan Sabah).
Boyoon Montiri, Datuk Seri Haji Hajiji Haji Noor minoboros, Koporintaan Pogun tumopot doid kopoburuan komulakan om kaakun kaantaban i potoguang kotinanan miagal Longkod Pintoriningan Komulakan Monfort (MYTC), i okurian intodonon nindopuan pointatap om toririmo montok monokodung diolo’.
“Koporintaan Pisompuruan om Pogun pinopointutun mogisusuai inggisaman montok papatantu’ kotinanan miagal MYTC kaanu koundaran, kaampai kinopongingkawasan kousinan bajet montok kotinanan balajaran om Pintoriningan Teknikal om Vokasional (TVET) montok mongingkawas kosodiaan intodonon om kopoinggoyoan skim sikulasip om dermasiswa montok susumikul, o wookon,” ka disio id Ramai Makan Totuong Kotundunan Kinouliton Toun ko-25 MYTC id Magellan Sutera Harbour di songkosodop. Boboroson disio binasa’ di Montiri Kousinan, Datuk Seri Masidi Manjun.
Minoboros isio, Koporintaan Pogun pointotopot montok monokodung sondikoton MYTC montok monguhup komulakan i amu’ songkuro kinonosipan miampai popouyu diolo’ kosiwatan montok mongurias kinotungkusan komosikinan om montok diolo’ mamagampot kosiwatan poinponu’ diolo’.
Minoboros isio, ilo’ nopo nga’ iso’ kaantakan oponsol montok MYTC mamaramai 25 toun id koponudukan komulakan.
“Mintong di ikonomi Sabah monilombus kosunion di osonong, kopoburuan komulakan kapapanau tonggungan oponsol id komogoton ikonomi kinoiyonon tokou. Graduan MYTC okon nopo ko’ pakakaraja’ kikomilaan, yolo’ nogi’ nga’ tulun di kouhup kumaa kosunion om komogoton mogigiyon tokou.
“Yolo’ nokopokito do balajaran teknikal om vokasional nopo miagal kigatang om kikuasa’ id koponuridongan timpu dumontol di lobi kosonong montok komulakan Sabah.
“Ababayan koponuridongan ‘watak’ Monfort kiguno kopion onuan kopomodulianan. Inggisaman dilo’ montok papagaras komulakan om momoguno kosiwatan poinponu’ diolo’, lolobi no yolo’ i mantad poonsokid om yolo’ i natatak mantad balajaran poinggayo, nopo nga’ royohon.
“Inggisaman diti kopiongoi di angkab Sondikoton Sabah Maju Jaya (SMJ) om poposotol tonggungan Koporintaan Pogun kumaa kapagarasan komulakan miampai poposodia’ kosiwatan kumaa sukod wagu do popoinggayo komilaan diolo’ om monguhup kumaa ikonomi om mogigiyon pogun,” ka disio.
Hajiji nga’ minokianu nogi’ MYTC do mintong id toguang om tumanud kinoburuon osikap kaganaan pakarajaan, i ounsub do kinomogoton tiknologi om kinosimbanon koyuyuon ikonomi.
“Kotinanan balajaran tokou kaampai no TVET mositi’ popisudong tinan di kinosimbanon diti montok kotilombus kosudong om kiwaya’. Otumbayaan oku MYTC tumilombus momuruan haal diti.
“Miampai mamaramit tiknologi wagu, poposuni inovasi om monginggirot pisokodungan pomorunan, MYTC kaanu tumilombus poposodia’ balajaran vokasional i kopomogonop do kogunaan timpu diti om timpu dumontol,” ka disio.
Hajiji nga’ ounsikou nogi’ do pinoboros palan MYTC montok manampasi kawagu Ababayan Koonduan, i kopiongoi di inggisaman pogun montok mongunsub kaadangon koulunan om papagaras koonduan id goduduo tonggungan ikonomi om kopomuruanan.
“Miampai moningkanan kumaa koburuon koonduan tomulok, MYTC kouhup kumaa koyuon sosio-ikonomi di lobi poinbuntuk om miadang id Sabah,” ka disio.
Hajiji pinopolombus nogi’ kopongunsikohan do Koporintaan Pogun kumaa Brothers of St. Gabriel, Kotinanan Gabenor MYTC, nogi’ mongungulud om sitaf MYTC mantad tinongungan nogi’ karaja’ agaras diolo’ i nokoposili kotinanan diti sabaagi tukod mogigiyon om manahak kosiwatan koduo kumaa komulakan.
“Kumaa mingluluda’ om alumni, yokoyu no koondosan do MYTC om popogura’ id kinalantaion dilo’. Kounsikohan nogi’, kumaa oinsanan tambalut pomorunan om mananakadai mantad sokodung ouli’ diolo’. Suai ko ilo’, ponongkounsikohan nogi’ dahai kumaa di Tan Sri Bernard Dompok, i minonguhup kumaa misi diti,” ka disio.
