Clarence (koduo, gibang) ruminamit tandamato mantad di Trixie.
KOTA KINABALU: Fakulti Sains Sosial om Kemanusiaan (FSSK), Univositi Malaysia Sabah (UMS) miampai Kursi Kadazan-Dusun UMS pinapaanjur ababayan panambarasan maya’ piromutan i ki’uhu “Sogit: Kinosimbanon Kopoindalanan Nubasanan Sogit id Nayatan Mogigiyon Kadazandusun id Sabah” di kaawagu diti.
Momuruan manganganjur Dr. Trixie Marjorie Tangit minoboros ponomborsan i natanud 800 tutumanud kaampai suusmikul toun iso’ UMS dilo’ kituduan mongingkawas toilaan di tongo’ tutumanud karait kinolumison mogigiyon Sabah maya’ kurusus ‘teras’ fakulti i ki’uhu ‘Budaya dan Masyarakat di Sabah’ (Koubasanan om Mogigiyon id Sabah).
“Id ababayan dilo’, tolu mononomboros yolo’ nopo i Luguan Tanak Mamasok Pogun (KAN) Roger Meylin Impou (Kuut Mamasok Pogun Watas Kota Kinabalu), Luguan Tanak Mamasok Pogun (KAN) Viola Giluk Dompok (Kuut Mamasok Pogun Watas Penampang) om i Molohingon Kampung, David Raji Joy (Kampung Kopimpinan, Putatan, minongobi’ di Luguan Watas OKK Datuk Stephen Sondoh (Kuut Mamasok Pogun Watas Putatan) pinopoilang karait nubasanan sogit id nayatan mogigiyon KadazanDusun id Sabah,” ka disio.
Ka di Roger, sogit nopo nga’ kinoubasanan laid id mogigiyon Mamasok Pogun i kosili danda’ tu’ minanahub undang-undang Mamasok Pogun.
“Sogit kituduan manamong kotoronongon, manalasai kokusutan, momoluku pigogutan suai ko’ mongontok korugian montok koponohuban adat id Sabah. Id sunduk Kuut Mamasok Pogun, sogit kapaampai ukuman kiraha’ (kopohompit koponumbolian tayam) tumanud Enakmen Mamasok Pogun (Undang-undang Adat Anak Negeri 1995).
“Mantad sunduk sinusuyan kahandamna, sogit pinaralad kumaa piromutan miampai rusod lolobi no id kinoubasanan ‘pagan’. Sundung ingkaa, noondo diti, ababayan miagal diti ingkuri’ no do aantakan id Kota Kinabalu mantad no do kinotonudan ugama’ om osusa’ maganu bobolian, nga’ kakal poindalanon id koiyonon labus kakadayan,” ka disio pinopointalang.
Ka wagu di Roger, sundung kinosimbanon timpu i nokoinwagu nokoowit kumaa kinosimbanon kararalano’ koposion sosial om kinotonudan ugama’, kopoindalanan nubasanan sogit id nayatan tinaru Kadazan Dusun amu’ ogumu’ kinosimbanon sasabab no do nubasnaan sogit nopo nga’ kinoubasanan i notungkusan mantad di laid po.
“Sukog wagu babaino’ kipomusarahan do nubasanan sogit diti nakalaid no, noiduanan timpu om kipomusarahan ‘kolot’. Nga’ aiso’ pili’ diolo’. Manahub adat, manahub pantang mositi’ ontokon sogit,” ka di Roger pinoposotol.
Id ababayan dilo’, tongo’ mononomboros pinoposotol do danda’ om nubasanan sogit nopo nga’ sopisuai id tikid watsa (kampung sompoopori) miampai molohingon kampung nonuan kuasa’ montok mongontok danda sogit lolobi no id kes koponohuban adat toi pigogutan om kaanu sumili tulun tanga’ montok kapanalasaian di oulud id nayatan kampung.
Naamot dilo’, KAN Viola Giluk Dompok minoboros sogit kapaampai do koponohuban undang-undang adat Mamasok Pogun amu’ momuntuk ugama’ toi tinaru, gigisom po do kapaampai Mamasok Pogun nga’ sogit pointatap poontokon.
Ka disio maan paagalan laang di kadala’ om amu’ osurupai i noumbalan winonsoi di tulun songkosuayan kumaa Nulu Nalabu ontokon sogit kopohompit ababayan koporundunan tayam miagal karabou, manuk toi wogok om susuhoton do ababayan (ritual) montok monisiou sunduan om tongo’ rusod id nulu tumanud kotumbayaan mogigiyon Kadazan Dusun.
“Id timpu kaawagu diti, tantu’ do haro kinosimbanon id adat kinoubasanan (sogit). Pipiro nubasanan koubasanan lolobi no id nayatan tongo’ momolohing kakal papanahon. Nga’ sukod wagu pikikiro doti’ amu’ kopuriman sabab okuri toilaan karait nubasanan sogit id nayatan mogigiyon Kadazan Dusun id Sabah.
“Iti sabab no, Molohingon Kampung kikosiwatan no do monongkiboros tongo’ adat sogit pihoboian id ababayan miaboi om ababayan nodi poinggompit.
“Kogumuan nubasanan tungkusan diti papanahon nodi mogigiyon pagan pogulu diti. Nga’ kogumuan tokou kiharo no ugama’ sompoopori. Mantad dilo’ okon ko’ koinsanai adat di papanahon. Pipiro po adat i asaru’ tokou awaya’an tikid tadau,” ka di David Raji pinopointalang.
Nokotindapou nogi’ id panambarasan dilo’, Mongingigit Kursi Kadazan-Dusun UMS, Profesor Datuk Seri Clarence Malakun.
