Hajiji suminasi’ di Adzmir (gibang) pinapatahak dokumen kuminaa di Xu (wanan).
KOTA KINABALU: Boyoon Montiri, Datuk Seri Haji Hajiji Haji Noor minoboros, Sabah noondo id kosimbanon montok mamarami guno poinponu’ kinoburuon tiknologi otomou miampai projik keluli otomou kigatang RM20 bilion id Taman Pomorunan Tumau om Gas Sipitang (SOGIP).
Sumanasi’ ababayan kinapatahakan Pibatosan Induk (Heads of Agreement) mantad Sabah Energy Corporation Sdn. Bhd. (SEC) kumaa Esteel Enterprise Sabah Sdn. Bhd. (Esteel Sabah) montok mangaba’ 150 riong kaki padu standard sangadau (mmscfd) gas sandad id Menara Kinabalu di baino’, minoboros isio, Koporintaan Pogun mamaramit kopoopuan id produk i kapanahak koundaran ginoris aanu monginwagu, koponginsonongan ponguludan sampal om mongunsub panalasaian di po’ompus.
“Mangapu’ id produk mantad tiknologi otomou okon nopo ko’ kopiongoi di rikoton kopomogompian pomogunan nga nogi’ kapanahak koundaran pidagangan di nokoburu’ osikap montok panalasaian osuau sandad,” ka disio.
Hajiji minomohulit hal diti nulingad disio id Pitimungan Limunduk Global Eknomi om Tiknologi China (GCET) id Shenzen, China, di wulan Kohopod om Iso’ katatalib do Sabah nokopongintutun pipiro pomorunan agayo i okon nopo ko’ kapamatos somuli’ di agayo kumaa kopoopuan nga nogi’ nokouhup kumaa timpu dumontol di lobi kosonong om otunda’.
“Iti kopokotanda’ kotumbayaan Sabah kumaa projik keluli otomou, i po nogi’ wookon kopoopuan i mongobi’ posunduran kosunion ikonomi om kapapanahan koburuon pogun.”
Maya’ pibatosan dilo’, SEC mangaba’ 100 riong mmscfd gas sandad kumaa kilang kapamansaian keluli Esteel Sabah om pomoruhangan 50 mmscfd montok kopoindalanan kuasa’ loji dilo’ id timpu 20 toun dumontol.
Kinouhupan oponsol SEC kumaa projik diti kopointalang tonggungan oponsol dau id kopointutunan inggisaman po’ompus om kopointonod koburuon watas, ka disio.
Projik Keluli Otomou nopo nga’ projik kapaampai tolu fasa i minomili’ gas sandad sabaagi ejen kopongingkurian nung piadangon di kok om tohun watu, mongingkuri’ kopoiduan karbon soginumu’ 70 pihatus om koposili dilo’ osiriba’ karbon, opulokis om osuau sandad.
Esteel Enterprise Sabah, tanak komponi Green Esteel Pte. Ltd. Singapura, suminain pibatosan pajakan tana’ miampai Sabah Oil and Gas Development Corporation Sdn. Bhd. (SOGDC) montok monuridong kilang pamansaian id SOGIP doid Sipitang di tulan Kohopod om Iso’ 2022.
Fasa 2 projik diti, miampai pongiingkiraan kos soginumu’ USD1.93 bilion, pikikiro kotimpuun toun diti om opongo dumontol 2026.
Projik diti pikikiro kopongimbulai kikiro 2,795 kosiwatan pakarajaan id timpu kopoindalanan dau.
Minongobi’ SEC id ababayan kinapatahakan Pibatosan Induk i Luguan Upisor Eksekutif dilo’, Datuk Adzmir Abd. Rahman, naamot Esteel Sabah nobian di Potunud Karaja’, Xu Yihang.
Nokotindapou nogi’ i Montiri Koburuon Pomorunan om Mongindapu’, Datuk Phoong Jin Zhe; Ponorikohon SEC, Datuk Annuar Ayub; Monunurat Koporintaan Pogun, Datuk Seri Sr. Safar Untong om i Luguan Upisor Executive SOGDC, Datuk Harun Ismail.
