Haji Hajiji Haji Noor
PUTATAN: Puru Kotinanan Islam Pototongkop Sabah (USIA) kiguno tumilombus monguhup porinta’ papasarok kawagu ikonomi pomogunon maya’ piromutan ‘business circle’ i pasanganu di tongo’ puru om raan, ka di Boyoon Montiri, Datuk Seri Haji Hajiji Haji Noor.
Ka disio, suai ko’ ababayan doun mogigiyon om dakwah, USIA nga’ monguhup id kopoburuan piromutan ikonomi pomogunon maya’ ababayan pidagangan runcit, monuridong koperasi om pipiro raan mongindapu’ di suai.
“Koporintaan Pogun tumilombus monokodung inggisaman USIA id kopoindalanan tongo’ ababayan i kapanahak koundaran kumaa mogigiyon id pogun diti, kaampai no dakwah, doun mogigiyon om ababayan mongindapu’, potilombus dino monguhup id koponompuruan mogigiyon doid pogun diti,” ka disio id Ramai Kopoimaganan Pitimungan Agayo Tounan Mongongobi’ USIA Ko-37, Toun 2022 id Lintuhun Agayo Hotel Pan Borneo, do hiti di konihab.
Teks boboroson di Hajiji binasa’ di Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya.
Hajiji minoboros, USIA kiguno momoguno poinponu’ kabaahan di haro montok monguhup puru kosuul no mongimbayat sukod wagu id kopoingkawasan komilaan tinan i kopiongoi di kogugunoon maso-maso.
Ka disio, sukod wagu om ‘puteri’ sabaagi tumungkus momuruan timpu dumontol kiguno inggonopan do balajaran, komilaan teknikal, lolobi no toilaan ugama’ i kosili ponilombus kumaa kotilombuson kapapanahan dakwah om tarbiyyah id pogun om pomogunon diti.
Ka disio, USIA tinuridong mimpau di koponompuruan ummah maya’ sunduan piompinoian doid soosnginan paganakan di agayol, kaanu kopoluhub kawagu tonggungan om kogunaan oponsol (core-business), nogi’ papaparagat ababayan minsomok tulun asnaf om tompinai wagu (mualaf) miagal ziarah om ‘sentuhan kasih’, nogi’ ababayan mimpau sunduan paganakan montok popironit ukhuwah silaturrahim doid nayatan puru om mogigiyon.
Hajiji otumbayaan miampai ginoris puru kopuli koinsanai watas id poliliput pogun, USIA okon nopo ko’ songinan o tinan okon koporintaan (NGO) Islam bobos otuo id Sabah, nga nogi’ sabaagi kotinanan bobos agayo miampai tonggungan oponsol nopo montok papagaras om popoinggumu’ ababayan dakwah.
“Kalansanan USIA kotilombus tumopot id kopoindalanan kosimbanon do mamagampot ‘visi’ om ‘misi’ papagaras kinalantaion dilo’ id sunduk koponguludan om kopoindalanan, kopuli do hal koburuon ikonomi, kopongimbulaian nindopuan, kopoburuan intodonon tulun om balajaran,” ka disio kawagu.
Ka disio, miampai prinsip ‘amar maaruf nahi mungkar’ (magangat kumaa kosonongan om mongilag di araat) i nosili nigitan kotinanan diti, USIA apatut magangat okon nopo ko’ puru, nga’ oinsanan mogigiyon kumaa kosonongon om mongilag karaaton.
“Iti sabab no do USIA toririmo kosili tiintangan mogigiyon tu’ mogowit kokitanan Islam. Kada’ do sabab no do nila sontiri’, araag susu sambalanga’. Singguunon o konsep ‘amar makruf nahi mungkar’ dilo’ montok ugama’ om pogun,” ka disio pinoposotol.
