Fahmi (wanan) minananud di Shahelmey suminuang id Lintuhun Kuliah Longkod 2 UMS.
KOTA KINABALU: Koporintaan pogun tumopot montok tumonggoi miampai koporintaan Pisompuruan id koponoibahan pomusalaan siber lolobi no pomusalaan kousinan om ‘scam’ i kakal kopsourat kinoinsawaton di atalang id Sabah.
Boyoon Montiri Datuk Seri Panglima Hajiji Haji Noor minoboros tumanud ‘statistik’ Koupisan Ponoriukan Pomusalaan Komersial Longkod Upis Pulis (IPK) Sabah, ginumu’ kes pomusalaan siber i naantakan id Sabah kopokito koyuon kinoinsawaton id suang timpu tolu toun potohuri diti.
“Montok timpu toun 2020 gisom wulan Kosiam 2023, soginumu’ 4,687 kes pinoruput, i kapaamapi ponit kasalaan miagal ‘phone scam’, ‘love scam’, kapaalasan di aiso’, kopoopuan, pomolian ‘online’ om akta pomusalaan komputer, i nokoowit kinorugion soginumu’ RM100,087,125.10.
“Mantad 4,687 kes, soginumu’ 1,069 kes pomusalaan siber nokoruput naantakan di toun 2020 naamot 1,169 kes di toun 2021; 1,206 di toun 2022 om soginumu’ 1,243 kes montok wulan Koiso’ Kosiam toun diti.
“Id suang timpu dilo’, ponit kasalaan mangakal pomolian online nokoposurat ginumu’ kes bobos akawas ilo’ nopo soginumu’ 1,823 kes, sinusuhut do phone scam soginumu’ 1,122 kes, kapaasalan aiso’ soginumu’ 817 kes, kopoopuan (603 kes), love scam (158 kes) om kaslaaan id siriba’ akta pomusalaan komputer soginumu’ 164 kes,” ka disio id kinopoimaganan Ababayan Jelajah Anti-Scam Kebangsaan 2023 Nayatan Pgoun Sabah id Univositi Malaysia Sabah (UMS) doros hiti di tadau baino’.
Teks boboroson disio binasa’ id Kumoduo Boyoon Montiri III/Montiri Karaja’ Agayo Datuk Ir Shahelmey Yahya.
Tumanud disio, kes pomusalaan siber om kasalaan id siriba’ Akta Pomusalaan Komputer id Sabah nokopogowit di nogompitan nokotoguang kinorugion kiginumu’ RM24,8885,763.50 di toun 2020, naamot montok toun 2021 nopo nokoposurat kinorugion RM25,427,844.42 om RM21,749,610.61 di toun 2022.
Naamot, po’ompus wulan Koiso’ gisom Kosiam toun diti, ginumu’ kinorugion nokosurat soginumu’ RM28,023,906.57.
“Ginumu’ diti kopotongob, kohondot dilo’ mongunsubo ku rayat Sabah kosuul no moomougno internet do momonsoi ruputan kopohompit kaantakan scam om kapangakalan id piromutan di awaya’an.
“Ruputan di wonsoiyon oponsol kopio montok monguhup bohogian kikuasa’ momonsoi ponoirisidan takal-akal momumusala’ kaampai no scammer nogi’ momonsoi laang kopongilagan di apatut montok mongumolig tulun ginumuan mantad kotilombus koimamang,” ka disio pinopointalang.
Pinabanta’ di Hajiji, bohogian perbankan, popogirotkuasa’ undang-undang om agensi koumoligan kiguno tumilombus mimsokodung montok monoibau hal dilo’ miampai popoindalan undang-undang katatapan om kooturan wagu i lobi kiwaya’, pisokodungan id nayatan sompomogunan montok popironit piromutan monotk piilangan kointalangan, nogi’ mangapu’ id tiknologi wagu montok mongilo om magantob karaaralano’ kopongudutan id piromutan miampai osikap om kiwaya’.
“Mogisusuai laang pinapanau id inggisaman monoibau pomusalaan scam om kapangakalan suang piromutan do bohogian koporintaan, agensi om koupisan, komponi korporat nogi’ tongo’ Tinan Okon Koporintaan (NGO).
“Wookon nopo nga’ pinonuridongan Longkod Respon Scam Kebangsaan (National Scam Response Centre – NSRC).
“Naamot dilo’, pipiro katatapan undang-undang di haro mantad pikikiro doti’ kiguno simbanan kaampai Akta Pongilagan Ponimbanan Tusin Haram, Pongilagan Kapanakadaian Korongiton om Asil mantad Ababayan Haram 2021, Kanun Kosindualan, Kanun Tatacara Pomusalaan om susuai po kopiongoi di pomogunaan om kaantaban timpu baino’,” ka disio.
Ka kawagu di Hajiji, daamot idlo’ koporintaan aparagat minggisom manahak kopurimanan monotk monuduk moomoguno di kopongundoronokan om kapanangadan siber, kakal ogumu’ mnoomoguno internet i oburunsut om obintumbayaan di takal-akal scammer i momurilong pomusarahan om kopurimanan nogompitan.
“Tikid tadau haro nopo mogigiyon tokou i koimamang do scammer. Kopomusalaan scam koimbulai miagal kulat, gisom haro i minsiisili sabaagi puru pulis, upisor Kotinanan Asil Suang Pogun (LHDN), sitaf kuut, upisor Koupisan Kositum, upisor bank om mogisuusai po ralan montok mongudut di nogompitan,” ka disio pinopointalang.
Ka disio kawagu, pomusaralaan pongudutan id piromtuan doid Sabah nokopokito koyuon mingkawas di atalang om kopotongob.
“Kohondot dilo’, kada’ kobingudutai di pomolugut-lugut i popouyu somuli’ agayo id timpu oruhai, imuayon pgulu nung pouyuhan nunu-nunu. Bobos oponsol, oinsanan kointalangan sondiri’ kada’ koruhai kopio do popoilang di tulun i amu’ otutunan, lobi-lobi podi nung maya’ no do pamalahawan telefon,” ka disio kawagu.
Kalansanan disio mooi do ababayan jelajah miagal diti paraladon gisom kumaa pototongkop pogun mooi do rayat id nayatan siriba’ kanau koundarna om amu’ koimamang di momumusala’ siber toi scammer.
Nokotindapou nogi’, Montiri Piromutan om Digital Fahmi Fadzil om Kumoduo disio, Teo Nie Ching, Luguan Monunurat Komontirian Piromutan om Digital Datuk Mohamad Fauzi Md Isa, Ponorikohon Kotinanan Potunud, CyberSecurity Malaysia Jeneral (B) Tan sri Zulkifeli Mohd Zin om Monguhup Timbang Canselor (Strategik), UMS Joachim Rajaram.
