Hajiji guminambar miampai tongo’ montiri, mongunguhup montiri, Monunurat Koporintaan Pogun, Datuk Seri Sr. Safar Untong, Luguan Monguasa’ Kopongilagan Susuap Malaysia (SPRM), Tan Sri Azam Baki om tongo’ kukumaraja’ koporintaan i nokotindapou id Ababayan Konvensyen Integriti, Tadbir Urus dan Antirasuah Toun 2023 (KITA 2023), om Sesi kinapatahakan Setifikit Nopupusan Ababayan Upisor Integriti Bertauliah (CelO) siri Bilangan 3 toun 2022 Koporintaan Pogun Sabah id SICC, Kota Kinabalu di tadau baino’.
KOTA KINABALU: Koporintaan pogun pointotopot montok popoindalan tongo’ inggisaman kopoingubasan om kopogirotan tinonggungan id surupukaraja’ koporintaan pogun, ka di Boyoon Montiri, Datuk Seri Hajiji Haji Noor.
Minoboros isio, kopongonjuran Konvensyen Integriti, Tadbir Urus om Antirasuah (KITA) 2023 nopo nga’ inggisaman agayo i monokodung kogorisan kumaa naangayan osonong sistem kopoindalanan pogun i opulokis mimpau do tinonggungan, kotonudan om kinotulidon
Kohondot dilo’ ka disio, limo karalano’ tingkananon pinoloting montok popoindalan tongo’ inggisaman kopoingubasan om kopogirotan tinonggungan dilo’ ilo’ nopo kumoiso’ maya’ Tonggungan Koponguludan Sawat (Komitmen Pengurusan Atasan).
“Kopomuruanan koporintaan pogun poposuul kopio do prinsip tinonggungan, kotonudan om kinotulidon, i hinombo do okito ilo’ maya’ sookdung koponguludan bobos akawas id kopotontuan pogun diti kosimbuat sabaagi moninimpuun, momumuruan om ponokotopong id koponguludan GIA (governans, integriti om magada’ susuap).
“Koduo, monginggirot kopurimanan di koponsolon kopogintongan risiko id kotinanan. Koponguludan risiko susuap poindalanon id tikid agensi montok mongingkawas korotian om kopurimanan upisor mooi kitonggungan id tikid laang om kuasa’ di pinatahak.
“Kotolu, monginggirot laang kapanamangan manalob risiko om kopogundoronokan kobolingkahangan tinonggungan, susuap, kapanansalaan om sala’ guno kuasa’.
“Kaapat, kiwaya’ kopiantangan om kopogirotan kuasa’an id kopotontuan kotonudan di tikid bohogian kikoundaran id kotinanan doid koinsanai agensi koporintaan pogun om kolimo, kapagarasan pintoriningan om piromutan koyuyuon tosonong id kopoingkawasan korotian om komilaan upisor id koponoibahan kobolingkahangan tinonggungan om susuap,” ka disio.
Hajiji pinopo’iliu ‘watu berlian’ ponokotanda’ kinopoimaganan Ababayan Konvensyen Integriti, Tadbir Urus dan Antirasuah Toun 2023 (KITA 2023), om Sesi kinapatahakan Setifikit Nopupusan Ababayan Upisor Integriti Bertauliah (CelO) siri Bilangan 3 toun 2022 Koporintaan Pogun Sabah om poingintong i Monunurat Koporintaan Pogun, Datuk Seri Sr. Safar Untong om i Luguan Monguasa’ Kopongilagan Susuap Malaysia (SPRM), Tan Sri Azam Baki id SICC, Kota Kinabalu di tadau baino’.
Minoboros isio dilo’ ontok pinopoimagon KITA 2023 om Sesi Kinapatahakan Setifikit Nopupusan Ababayan Upisor Integriti Bertauliah (CelO) Siri 36 Bilangan 3 Toun 2023 Koporintaan Pogun Sabah id Longkod Konvensyen Sompomogunan Sabah (SICC) do hiti, di tadau baino’.
Daamot dilo’ minoboros i Hajiji, koporintaan pogun maya’ nimpohon Hontolon Sabah Maju Jaya (SMJ) okon nopo ko’ masaan minggisom mononduli’ om popoburu’ kawagu ikonomi pogun, nga nogi’ monginggirot sistem kapatahakan koporintaan, mooi do kosili lobi opulokis, otulid, osikap osiau.
Montok mamagampot inggisaman dilo ka disio, momoguno ilo’ di kukumaraja’ koporintaan i kiginawo popoindalan karaja’, kidisiplin om kitonggungan doid kopoindalnaan tonggungan pinatahakan.
“Id Sabah, koporintaan pogun pinapatatap Hontolon SMJ sabaagi tonudon miampai angkab mogowit kopurimanan ‘inklusiviti’, kosongonuan toinsanan, koisana om tionggungan tikid mogigiyon montok papalantoi ababayan kopoburuan pogun.
“Kopoinggorisan kumaapat id Palan Kopoburuan Hontolon Sabah Maju Jaya 2021 – 2025 noipo nga’ ‘Kecemerlangan Tadbir Urus Yang Berintegriti’. Sinonong tinonggungan nopo nga’ poimpahan om kogunoon osuul id koponigampotan ‘misi’ om ‘visi’ di pinatatap.
“Montok tuduan diti, kinosonongon tadbir urus aanu monigampot maya’ apat karalano’ osuul, ilo’ nopo nga’ mongingkawas ababayan magada’ susuap; kapatanaman koyuyuon osonong om pogoyuon karaja’ bobos osonong; monginggirot karalano’ mogintong om mangadang; nogi’ kopoburuan palan magada’ susuap kotinanan,” ka disio.
Hajiji pinapatahak Setifikit ‘Penambahbaikan Tata Kelola Agensi (APTA)’ kuminaa di Monunurat Pointatap Komontirian Sabah, Datuk Mohd. Sofian Nair id Ababayan Konvensyen Integriti, Tadbir Urus dan Antirasuah Toun 2023 (KITA 2023), om Sesi kinapatahakan Setifikit Nopupusan Ababayan Upisor Integriti Bertauliah (CelO) siri Bilangan 3 toun 2022 Koporintaan Pogun Sabah id SICC, Kota Kinabalu di tadau baino’.
KITA 2023 i pinopointanga’ uhu “Integriti Teras Perkhidmatan Madani” nopo nga’ angkab koporintaan pogun montok manganjur iso’ konvensyen ki’uhu tinonggungan i pinokitanan di boyoon montiri ontok ababayan Tadau Integriti Pogun Sabah Toun 2022.
Lobi koimbayat, KITA 2023 nosili kokitanan koondosan koporintaan pogun Sabah sabaagi manawalai pinotomod i kiharo kopotutan poinsuul sabaagi manganganjur. Ko’oitan diti koposili Sabah sabaagi monimpuun, momuruan om tanda’ ponokotopong id koponguludan GIA id Malaysia.
“Amu’ oiduanan nogi’ ponontudukan kopurimanan magada’ susuap paraladon kumaa oinsanan nayatan umur om monginggirot po do ababayan kopointutunan nogi’ monuduk mogigiyon di koyuyuon osoong om monuridong pogogoyuon arayou.
“Kalansanan ku o oinsanan inggisaman dilo’ aanu popoindalan miampai osonong om kiwaya’ mooi do kapanahak koundaran om somuli’ mitilombus kumaa rayat,” ka di Hajiji, i minoboros nogi’ do kopoinggirotan tinonggungan nopo nga’ komponen bobos oponsol id kopotilombusan nubasanan tinonggungan.
Hajiji minoboros, koporintaan pgoun nokopoindalan inggisaman ‘Minggu Integriti Komontirian’ i nakapaampai 10 komontirian om Koupisan Boyoon Montiri.
“Kopoindalanan Minggu Integriti diti uludon mogisosowoli solinaid sominggu kapaampai tonggungan montiri, koponguludan bobos akawas, upisor om oinsanan pakakaraja’ komontirian kaampai koupisan, tinan kikoundangan, Bohogian Kikuasa’ Kinoiyonon (PBT) om komponi kikoundaran kopoirntaan (SBK).
“Ababayan nopo diti nga’ kinalantaion agayo montok Sabah mintong kumaa ginumu’ kogompitan di poinpuli, sinoong ababayan om i isoiso’ no pinoindalan id Malaysia,” ka disio.
Ka disio, sabaagi rikoton id koporikotan sistem kapatahakan kitonggungan, koporintaan pogun pointotopot montok monimpuun, momuruan om sumili ponokotanda’ rontob koinsanai inggisaman kopoinggirotan GIA id Malaysia maya’ tolu ‘terma’ sukuon ilo’ nopo kumoiso’, popoindalan kopoinginanan tadbir urus mimpau prinsip tinonggungan, kotonudan om kinotulidon id surupukaraja’.
“Koduo, papagaras sistem koponguludan ruputan ginumuan di opulokis om kiwaya’ om kotolu, papatantu’ kotonudan kumaa undang-undang om kooturan i mamaso poinggirotkuasa’ poindalanon,” ka disio.
