Hajiji Haji Noor
TUARAN: Koporintaan Pogun minongingkawas kapanahakan sikulasip pinsingilaan mantad RM50 riong kuminaa RM100 riong tikid toun, ka di Boyoon Montiri, Datuk Seri Hajiji Haji Noor.
Ka disio, iti montok papatantu’ tangganak Sabah koponilombus pinsingilaan diolo’ id nombo-nomob kotinanan pinsingilaan takawas (IPT).
Minoboros isio, iti oponsol sabab balajaran om ‘modal insan’ nosili wookon ababayan tingkananon do koporintaan pogun id koposikapan kopoburuan Sabah.
“Modal insan di ‘cemerlang’ om ogogonop oponsol kopio montok papalantoi mogisusuai katatapan, inggisaman om ababayan kopoburuan koporintaan potilombus dino popsoikap komogoton pgoun kumaa rontob lobi kasawat,” ka disio ontok pinopoimagon pinomupusan Kem Matematik Perdana id Lintuhun Sikul Mananga’ Kabansaan (SMK) Taman Ria, do hiti di tadau baino. Teks boboroson disio binasa’ di Luguan Monunurat Pulitik kumaa Boyoon Montiri, Datuk Abdul Kassim Razali.
Soginumu’ 300 susumikul mantad 10 tinan sikul mananga’ id watas Tuaran minampai kem onjuran Univositi Malaysia Sabah (UMS) dilo’.
Hajiji minoboros, koporintaan pogun koilo di naangayan mato balajaran Matematik om Matematik Tambahan kosuul no id Sabah i kopotongob.
Tumanud disio, iti kaampai no naangayan pipiro mato balajaran mimpau Sains miagal do Fizik, Kimia om Biologi i osiriba’ nung piadangon di naangayan susumikul id pogun ngaawi ‘suai doid Semenanjung Malaysia.
Ka disio, mantad no do kotongoban dilo, koporintaan pogun tumilombus manahak koposuulan kumaa kopoburuan om kopoingubasan kaganaan Sains, Tiknologi, Kejuruteraan om Matematik (STEM) id Sabah.
Kohondot dilo’, mimang isio Komontirian Sains, Teknologi om Inovasi miampai UMS sumikap monuridong songinan Puruankuasa’ Piuhupan miampai Koupisan Balajaran Pogun om tongo’ kotinanan koporintaan poinggompit montok monoibau kolomogonan om kinosiribaon kororohian susumikul kumaa mato balajaran Matematik om Matematik Tambahan id Sabah.
“Nung kiguno, pohoroon iso’ ‘Sidang Pleno’ montok mogiboboros hal diti om turidongon o ababayan, inggisaman om palan pinotomod i kapaampai kopogorisan om kapagarasan Matematik om Sains montok tangaanak tokou id Sabah.
“Koporintaan Pogun posodia’ popoobi’ kousinan pinotomod montok monoibau kobolingkahangan om kolomogon di atalang diti. Mimang tokou kokito montok 10 kumaa 20 toun dumontol, hal om kobolingkahangan Matematik okon nodi ko’ pomohimpogong agayo kumaa tangaanak Sabah montok umampai karaja’ abaal i kopohompit kaganaan Sains, Tiknologi, Kejuruteraan om Pongubatan,” ka disio pinoposotol.
Hajiji minoboros, tumanud kointalangan mantad Ruputan Perangkaan Balajaran Malaysia toun 2020 gisom toun 2022, ginumu’ susumikul id Sabah doid aliran Sains id nayatan Setifikit Balajaran Malaysia (SPM) kakal kikiro 15 pihatus.
Ka disio, hal dilo’ sopisuai tokuri’ di angkab koporintaan pogun maya’ Hontolon Sabah Maju Jaya (SMJ) mooi t inimungan abaal id kaganaan Sains, Tiknologi, Kejuruteraan om Pongubatan aanu monginggumu’ dumontol toun 2030.
Kohondot dilo’ kalansanan disio oinsanan kotinanan koporintaan di poinggompit, kapaganul aang manalasai hal ngaawi’ dilo’ do osisikap.
“Waya’ kokurion ginoris karaja’ id siktor abaal i kapaampai kaganaan Sains, Tiknologi, Kejuruteraan om Pongubatan koponginraat kogugunoon pidagangan ginoris karaja’ montok pogun Sabah do timpu dumontol, i potilombus dino kopomohimpogong nogi’ inggisaman kopoburuan sosio-ikonomi om tiknologi id pogun diti,” ka disio kawagu.
