Hajiji Haji Noor
KOTA KINABALU: Kotinanan pinsingilaan takawas miagal Univositi Malaysia Sabah (UMS) papamanau tonggungan oponsol id koponguhupan lansanon mongimbulai koyuyuon osimbayan montok sukod wagu sumompuru ginoris karaja’.
Boyoon Montiri, Datuk Seri Hajiji Haji Noor minoboros, sabaagi songinan kotinanan pinsingilaan akawas, UMS kiguno momuruan doid koponguhupan koinsanai ginoris karaja’ mamarati sukod wagu miampai lobi kosonong.
“Iti okon nopo ko’ kirati popoindalanan tiknologi digital doungkaawagu id karajaon, nga nogi’ popoinsingubas tinan di kinosimbanon mod karaja’ om piromutan.
“Kinoburuon e-bakat i kapaampai toilaan om komilaan di ‘inovatif’ om kosudong, om i bobos oponsol, kopuriman mantad sunduk ‘etika’, okon nopo ko’ oponsol montok kosunion modal insan nga nogi’ montok kopongimbulaian lansanon timpu dumontol.
“Iti no pogi’ oponsolm ontok kiharo piromutan karaja’ di aparagat id pialatan kotinanan pinsingilaan akawas om pomorunan, nogi’ mogisusuai kotinanan koporintaan om okon koporintaan,” ka disio id pitimungan kopomuruanan “Memperkasa Kepelbagaian dalam Kepimpinan: Melayari Kerumitan, Merangkul Perbezaan” id Longkod Konvensyen Sompomogunan Sabah (SICC) do hiti di tadau baino’. Teks boboroson disio binasa’ di Montiri Koburuon Pomorunan om Kopongindopuan, Phoong Jin Zhe.
Pitimungan dilo’ piniuhupan manganjur do UMS, Akademik Kepimpinan Pengajian Tinggi (AKEPT), Komontirian Pinsingilaan Takawas (KPT) om Invest Sabah Berhad.
“Maya’ no do kogompitan miagla diti kaanu tokou monoibau pisuayan sinakagon. Pitimungan miagal diti nga’ apatantu’ nogi’ pialanan pomusarahan ‘kritikal’ do aantakan i koponguhup mongintutun om papatanom kinosonongan kopomuruanan id nayatan puru oinsanan siktor i minaganu bohogian.
“Amu’ nogi’ olimon forum miagal diti kapanahak impohon kopurimanan om potilombus dino kapanahak pomusarahan kumaa koinsanai tutumanud montok minsingilo sompipi’ tiso’ om tiso’,” ka di Boyoon Montiri.
Ka wagu di Hajiji, pitimungan duo tadau diti koponguhup id kopomorotian poingkuro kopogisusuaian Sabah do otopot nopo nga’ kakamot i kapasaga’ sabab no do kinosusao’ di otoguang tikid tadau.
“Otumbayaan oku kopio do pogisusuaian tokou nopo nga’ ginaras tokou sabab tikid mantad dati’, mogowit kabaahan di poinpoopori dati’ kumaa karajaon, om oinsanan tokou mimang buru’ kumaa timpu dumontol di ogirot om ‘progresif’.
“Yati’ okon nopo ko’ momoguno tulun di kohunung montok momuruan kogugunoon nga yolo’ i pointotopot om kiwyaa’ id kopomuruanan om koponguludan montok papatahak karaja’ di wonsoiyon miampai tinonggungan,” ka disio.
Boyoon Montiri minoboros, iso’ po koyuon kopogisusuaian nopo nga’ koulunan.
“Id Sabah, ounsikou yahai sabab haro koonduan di osonong momuruan do kopomuruanan. Lansanon koonduan okon nopo ko’ popouyu kokitanan di poinsuai, nga yolo’ kopogowit nawawaya’an di ogumu, toilaan om komilaan di nakapangahak Sabah kumaa kinalantaion.
“Tinonggungan mogisuaian koonduan sabaagi tanak tondu’, taka’, sawo om tina’ nopo nga’ oponsol kumaa koyuon pososorili’ karajaon, lolobi no sabaagi lansanon, hinombo dati’ do minggisom kumaa koubasanan karaja’ poinponu’ ‘compassionate’ i ounsub do karaja’ agaras om kalantaion,” ka disio.
