Hajiji (kotolu, wanan) miampai sawo Datin Seri Juliah Salag, Montiri Koburuon Mogigiyon om Kasasanangan Rayat, Datuk James Ratib, Ponorikohon Kounsol Monontuduk Koonduan Sabah (MPWS), Datuk Dr. Hajah Tarsiah TZ Taman om naalap pinotomod minomutul kek kopihondot Ababayan Pamaramaian Tadau Koonduan Nayatan Pogun Sabah 2023.
KOTA KINABALU: Koporintaan Pogun pinopoobi’ RM4.2 riong kumaa Koupisan Hal Koonduan Sabah (JHEWA) om RM700,000 kumaa Kounsol Mononturuk Koonduan Sabah (MPWS) montok popoindalan mogisusuai projik nogi’ ababayan koburuon koonduan, kaampai no kopoindalanan om koponguludan dilo’ do toun diti, ka di Boyoon Montiri (KM), Datuk Seri Hajiji Haji Noor.
Ka disio, kinopoobian pinotomod nga’ pinatahak nogi’ montok projik timpu oniba maya’ Projik ‘Creating Millionaire Among Young Women’ (CreaM@YWE) kiginumu’ RM554,540 om RM3.4 riong montok Projik Akademi Kopomuruanan Koonduan Sabah.
Minoboros isio, mogisusuai inggisaman om ababayan id siriba’ Palan Koburuon Hontolon Sabah Maju Jaya (SMJ) i pinoindalan pogulu diti maan tilombuso’ diti toun 2023.
Hajiji ruminamit buuk Photobook Koonduan mantad di Ponorikohon Kounsol Mononturuk Koonduan Sabah (MPWS), Datuk Dr. Hajah Tarsiah TZ Taman katalib kinopoimpuunan dilo’ kopihondot kopihondot Ababayan Pamaramaian Tadau Koonduan Nayatan Pogun Sabah 2023.
“Wookon dilo’ nopo Ababayan ‘Outreach Santuni Wanita’ om Ababayan JHEWAnita montok papagaras tongo’ tina’ sosongulun om koonduan B40. Ababayan Santuni Komuniti i kihontolon mongingkawas kopolobusan om kapadagangan ‘produk’ di tongo’ mongungusaha’ tina’ sosongulun om koonduan B40 nopo nga’ wookon inggisaman wagu montok monompuan mogigiyon nga’ maan pohoroo’,” ka disio ontok pinopoimagon Ababayan Kapamaramaian Tadau Koonduan Nayatan Pogun Sabah Toun 2023 id Grand Ballroom, Magellan Sutera Harbour, do hiti di kosodop.
Hajiji minoboros, koporintaan toririmo monggisom om maganu laang po’ompus montok popironit pisuayan ‘gender’ (koulunan) maya’ inggisaman di minaan onuo’, i potuu maya’ do komontirian, koupisan toi ko’ kotinanan poinggompit tu’ ogumu’ koonduan kikabaahan om kikosiwatan montok mongigit karaja’ momonsoi katatapan id sosonginan kotinanan.
Id Sabah sondiri’ potitikid toun aantakan kosimbanon koonduan sabaagi momomonsoi kootusan, ka disio, i minoboros, id siktor karaja’ koporintaan, gisom wulan Kowalu’ 2023, ginumu’ om kointalangan koonduan momonsoi kootusan Koporintaan Pogun Sabah montok Kumoduo Monunurat Koporintaan Pogun Sabah kiginumu’ 33.3 pihatus ilo’ nopo nga’ songulun tondu’ mantad tolu tulun Kumoduo Monunurat Koporintaan Pogun.
“Montok karaja’ Monunurat Pointatap kiginumu’ 9.09 pihatus ilo’ nopo nga’ songulun tondu’ mantad 11 Monunurat Pointatap Komontirian. Pihotusan Kumoduo Monunurat Pointatap soginumu’ 40 pihatus ilo’ nopo 13 tondu’ mantad 43 Luguan Koupisan.
“Orohian oku poposotol do Koporintaan Pogun toririmo mongigit do prinsip kapagarasan koonduan sabab koonduan nopo nga’ iso’ mantad tukod koburuon pomogunon di bobos oponsol, okon nopo ko’ id sunduk sosial, pulitik om ikonomi, nga nogi’ kapaampai koinsanai hal koburuon pomogunon,” ka disio.
Minoboros isio, ogumu’ i nokoindalan do koporintaan montok moginsonong kopongumoligan om kotundunan pakakaraja’ kosuul no koonduan, wookon nopo ponimbanan kumaa Akta Kerja 1955 i kapaampai ponimbanan suti’ mogkosusu pinoinaru mantad 60 tadau kuminaa 98 tadau, suti’ ‘paterniti’ mantad 3 tadau kuminaa 7 tadau mooi do sansawo koponguhup sawo i kosususu tanak nogi’ touki patatapon popodokot notis karait kopurimanan pomigangahan seksual id karajaon.
Hajiji miampai tongo’ mamaramit Gaa’ Koonduan Pogun Sabah id kopihondot Ababayan Pamaramaian Tadau Koonduan Nayatan Pogun Sabah 2023.
Hajiji minoboros, Koporintaan Pogun pointotopot om tumilombus manahak sokodung ogirot kumaa koinsanai inggisaman i wonsoiyon do nombo-nombo boogian kaampai no tinan okon koporintaan (NGO) montok papagaras kopoburuan koonduan id pogun diti.
Kopiongoi di hontolon Koporintaan Pogun montok popoingubas mogigiyon opoduli’ om popomogigiyon surupukaraja’ osonong, ka disio, koporintaan po’ompus tumopot montok mongingkawas kasasanangan rayat.
Tumanud disio, amu’ mimud do isai yolo’, koonduan noondo diti kiharo ogumu’ kapabaahan id mogisusuai kaganaan om kitonggungan oponsol kumaa komogoton pomogunon, koburuon paganakan nogi’ monginggirot pilisihan id mogigiyon.
Ka diiso, tonggungan, tinoboi om kinopinogoton koonduan sabaagi sawo, songulun tina’, songulun tanak om sabaagi songulun mamasok Malaysia i kiginawo agayo kapanahak kopio pomusarahan kumaa toinsanan.
“Sundung sinuratan kinalantaion po’ompus potilombus nosigampot, amu’ tokou nuru’ do osontob ginawo. Karaja’ tokou montok papagaras koonduan kiguno uludon sabab koonduan kakal do poinwongkos di kobolingkahangan ‘stereotaip’ kohondot kopomuruanan koonduan, kogompitan koonduan sabaagi momomonsoi katatapan, tonggungan opilipat kumaa koonduan kikaraja’ i kiguno piadangon di sugaton karaja’ om koponguludan paganakan, nogi’ hal kopogkoruolan mimpau koulunan i kakal momuntuk koonduan,” ka disio pinoposotol.
